కేంద్ర ఆర్థిక శాఖ మంత్రి నిర్మలా సీతారామన్ సంచలన వ్యాఖ్యలు చేశారు. తెలంగాణలో పుట్టబోయే బిడ్డపై కూడా రూ. 1.25 లక్షల అప్పు పడుతోందని పేర్కొన్నారు కేంద్ర మంత్రి. విపత్తుల నిధి నుంచి తెలంగాణకు 188 కోట్లు ఇచ్చాం. ఇచ్చిన ప్రతి పైసాను క్షేత్రస్థాయిలో ప్రజలకు తెలియజేస్తాం. పార్టీల ఉచితాలపై సమగ్ర చర్చలు జరగాలి. రాష్ట్ర రెవెన్యూ ఆధారంగానే పథకాలు ఉండాలి. అప్పులు తీర్చే రాబడిని చూపించి రాష్ట్ర ప్రభుత్వం అప్పులు చేయాలని డిమాండ్‌ చేశారు.
ఇష్టమున్న రాష్ట్రాలకు నిధులు ఎక్కువగా ఇస్తున్నారని మంత్రి హరీశ్ రావు వ్యాఖ్యానించడం హాస్యాస్పదంగా ఉందని కేంద్ర ఆర్థిక శాఖ మంత్రి నిర్మలా సీతారామన్ అన్నారు. తెలంగాణకు కేంద్రం ఏం సాయం చేయలేదని తెలంగాణ మంత్రులు, ప్రజాప్రతినిధులు చేస్తున్న వ్యాఖ్యల్లో నిజం లేదని స్పష్టం చేశారు. ఆర్థిక సంఘం సిఫార్సుల ప్రకారమే రాష్ట్రాలకు నిధులుంటాయని తెలిపారు. ఇతర దేశాలతో పోలిస్తే భారత జీడీపీ ఆశావహంగా ఉందని నిర్మలా సీతారామన్ అన్నారు. చాలా దేశాల్లో ప్రస్తుతం ఆర్థికమాంద్యం పరిస్థితులు ఉన్నాయని చెప్పారు. భారత ఆర్థిక వ్యవస్థ ప్రపంచంలోనే అత్యంత వేగంగా ఎదుగుతోందన్నారు.
