ఇటీవల వాల్తేరు వీరయ్య సినిమా 200 డేస్ ఈవెంట్లో మెగాస్టార్ చిరంజీవి చేసిన వ్యాఖ్యలు తన లేటెస్ట్ మూవీ భోళా శంకర్కు కాస్త కష్టాలు తెచ్చిపెట్టాయనే చెప్పొచ్చు. ఎందుకంటే.. భోళా శంకర్ సినిమా టిక్కెట్‌ ధరలు పెంచాలని కోరుతూ ఏపీ సర్కార్కు దరఖాస్తు చేసుకోగా ఆ ప్రభుత్వం దాన్ని పెండింగ్లో పెట్టింది. దరఖాస్తు అసంపూర్తిగా ఉందని, మరిన్ని వివరాలు అందజేయాలని చిత్ర యూనిట్‌ను ఏపీ రాష్ట్ర ప్రభుత్వ వర్గాలు బుధవారం కోరాయి.
ఏపీలో 20 శాతం చిత్రీకరణ.. హీరో, హీరోయిన్‌ రెమ్యునరేషన్‌ కాకుండా రూ.100 కోట్ల బడ్జెట్ వ్యయం తదితర వివరాలు ఈ దరఖాస్తుకు జత చేయలేదని, వాటిని ఇవ్వాలని కోరాయి. భోళా శంకర్ సినిమా ఈనెల 11న విడుదల కానుంది. ‘పిచ్చుక మీద బ్రహ్మాస్త్రంలా సినీ పరిశ్రమ మీద పడతారేంటి?’ అంటూ చిరంజీవి చేసిన వ్యాఖ్యలు సంచలనం సృష్టించిన సంగతి తెలిసిందే. ఈ తరుణంలో ఆయన నటించిన భోళాశంకర్‌ సినిమా టిక్కెట్ల ధరల పెంపునకు ఇంకా ఏపీ ప్రభుత్వం అనుమతి లభించకపోవడం చర్చనీయాంశమైంది.
