చియాన్ విక్రమ్ హీరోగా దర్శకుడు గౌతమ్ వాసుదేవ్‌ మేనన్‌ దర్శకత్వంలో వస్తున్న మూవీ ‘ధృవ నక్షత్రం’. ఈ సినిమా ప్రారంభించినప్పటి నుంచి అడుగడుగునా అడ్డంకులే. ఆరేళ్ల క్రితమే విడుదలకావాల్సిన ఈ సినిమా ఆర్థిక సమస్యల కారణంగా వాయిదా పడుతూ వస్తోంది. ఎట్టకేలకు అన్ని అడ్డంకులు దాటుకుని.. ఈనెల 24వ తేదీన ఈ సినిమా విడుదల చేసేందుకు చిత్ర బృందం రంగం సిద్ధం చేసింది. అయితే తాజాగా ఈ సినిమా విడుదలపై చిత్ర బృందానికి మద్రాసు హైకోర్టు షాక్ ఇచ్చింది.
ఏం జరిగిందంటే.. శింబు హీరోగా గౌతమ్ మేనన్‌.. ‘సూపర్‌ స్టార్‌’ అనే చిత్రాన్ని తెరకెక్కించేందుకు ఒప్పందం కుదుర్చుకుని,రూ.2.40 కోట్లు తీసుకుని ఆ సినిమా పూర్తి చేయలేదని ఆల్‌ ఇన్‌ పిక్చర్స్‌ తరఫున హైకోర్టులో పిటిషన్ దాఖలైంది. తమ డబ్బు తిరిగి ఇచ్చే వరకు ‘ధృవ నక్షత్రం’ సినిమా విడుదల చేసేందుకు నిషేధం విధించాలని పిటిషన్‌లో కోరగా.. గురువారం రోజున ఈ పిటిషన్పై విచారణ చేపట్టిన మద్రాసు హైకోర్టు ఓ నిబంధన విధించింది. ఆల్‌ ఇన్‌ పిక్చర్స్‌ నుంచి గౌతమ్ తీసుకున్న డబ్బును శుక్రవారం(నవంబర్ 24న) ఉదయం 10.30 గంటల లోపు తిరిగి ఇవ్వాలని, లేదంటే సినిమా విడుదల చేయకూడదని ఉత్తర్వులు ఇచ్చింది.
