మణిపుర్లో మరోసారి మరణమృదంగం మోగుతోంది. ఆ రాష్ట్రంలో ఇప్పటికీ అల్లర్లు చల్లారడం లేదు. తాజాగా జరిగిన అల్లర్లలో 9 మంది మరణించారు. మణిపుర్లోని ఓ చర్చిలో దుండగులు కాల్పులకు తెగబడ్డాడు. ఈ ఘటనలో ఒక మహిళతో సహా 9 మంది మృతి చెందారు. మరో 15 మంది తీవ్రంగా గాయపడ్డారు.
తూర్పు ఇంఫాల్లోని ఖమెన్లోని ఓ చర్చిలో మంగళవారం రాత్రి దుండగులు కాల్పులకు తెగబడినట్లు తెలుస్తోంది. కాల్పులు జరిగే సమయంలో చర్చిలో 25 మందికి పైగా ఉన్నట్లు సమాచారం. క్షతగాత్రులు ప్రస్తుతం ఇంఫాల్లోని ఓ ఆసుపత్రిలో చికిత్స పొందుతున్నారు. ఈ ఘటనలో కుకీ మిలిటెంట్ ప్రమేయం ఉండొచ్చని పోలీసులు అనుమానిస్తున్నారు.
గత కొంతకాలంగా మణిపుర్లో అల్లర్లు చెలరేగుతున్న విషయం తెలిసిందే. తీవ్రమైన ఉద్రిక్తతలు చెలరేగడం వల్ల ఇటీవల కేంద్ర హోంమంత్రి అమిత్ షా మణిపుర్లో నాలుగు రోజుల పాటు పర్యటించారు. వివిధ గిరిజన సంఘాలతో భేటీ అయి శాంతి సయోధ్యలు నెలకొల్పడానికి ప్రయత్నించారు. ఈ క్రమంలోనే మణిపుర్ గవర్నర్ ఆధ్వర్యంలో ‘శాంతి కమిటీ’ని ఏర్పాటు చేశారు. అయినా అక్కడి అల్లర్లు అదుపులోకి రాలేదు.
