మనందరం రోజువారీ వాడే యూపీఐ (UPI) యాప్స్కు ఇప్పుడు పెద్ద ప్రమాదం వచ్చి పడింది. “డిజిటల్ లూటేరా” అనే కొత్త మాల్వేర్ టూల్కిట్తో హ్యాకర్లు మీ ఫోన్ సెక్యూరిటీని చిటికెలో బ్రేక్ చేస్తున్నారు. క్లౌడ్సెక్ అనే సైబర్ సంస్థ ఈ షాకింగ్ నిజాలను బయటపెట్టింది. ట్రాఫిక్ ఫైన్ అనో, పెళ్లి పత్రిక అనో వచ్చే మెసేజ్లను క్లిక్ చేస్తే చాలు.. మీ బ్యాంక్ ఖాతా ఖాళీ అయిపోయే ప్రమాదం ఉంది. అసలు ఈ మోసం ఎలా జరుగుతుందో జాగ్రత్తగా చదవండి.
డిజిటల్ లూటేరా అంటే ఏంటి?: టెలిగ్రామ్ గ్రూపుల్లో ఈ పేరుతో ఒక డేంజర్ కిట్ హల్చల్ చేస్తోంది. సుమారు 20కి పైగా ముఠాలు ఈ టూల్ను వాడుతూ అమాయకుల డబ్బులు దోచుకుంటున్నాయి. ఇది మీ ఫోన్లోని ఆపరేటింగ్ సిస్టమ్నే మేనేజ్ చేస్తుంది. ఇక దీనివల్ల యూపీఐ యాప్స్ నమ్మే సిమ్-బైండింగ్, యాప్ వెరిఫికేషన్ వంటి బలమైన సెక్యూరిటీ ఫీచర్లు కూడా పనికిరాకుండా పోతున్నాయి.
పెళ్లి పత్రిక పేరుతో ట్రాప్: ఈ మోసం చాలా సింపుల్గా మొదలవుతుంది. మీకు వాట్సాప్ లేదా ఎస్ఎంఎస్ ద్వారా ఒక లింక్ వస్తుంది. అది ట్రాఫిక్ చలానా కట్టమనో లేదా ఎవరైనా తెలిసిన వారి పెళ్లి పత్రిక అనో ఉంటుంది. ఇక మీరు ఆశపడి లేదా కంగారులో ఆ లింక్ నొక్కి యాప్ ఇన్స్టాల్ చేస్తే, మీ ఫోన్ కంట్రోల్ హ్యాకర్ల చేతికి వెళ్లిపోతుంది.
ఓటీపీల దొంగతనం ఇలా: ఒక్కసారి మాల్వేర్ మీ ఫోన్లోకి వచ్చిందంటే, అది మీ ఎస్ఎంఎస్లను చదివే పర్మిషన్ తీసుకుంటుంది. బ్యాంక్ నుంచి వచ్చే ఓటీపీలను (OTPs) మీకు తెలియకుండానే హ్యాకర్ల టెలిగ్రామ్ ఛానల్స్కు పంపించేస్తుంది. ఇక విచిత్రం ఏంటంటే, మీ ఫోన్లో ఆ మెసేజ్ మీరు పంపినట్టే కనిపిస్తుంది కానీ, అది మీ ప్రమేయం లేకుండానే హ్యాకర్లు చేస్తున్న మాయ.
లక్షల్లో దోపిడీ: ఈ మాల్వేర్ ఎంత వేగంగా పనిచేస్తుందంటే, కేవలం రెండు రోజుల్లోనే ఒక గ్రూప్ ద్వారా దాదాపు రూ. 25-30 లక్షల వరకు అక్రమ లావాదేవీలు జరిగినట్లు గుర్తించారు. ఇక హ్యాకర్లు మీ యూపీఐ ఐడీని వేరే ఫోన్లో రిజిస్టర్ చేసుకుని, మీ అకౌంట్ నుంచి వేరే చోటికి డబ్బులు మళ్లించేస్తున్నారు.
టెక్నాలజీ మనకు ఎంత మేలు చేస్తుందో జాగ్రత్తగా లేకపోతే అంతే నష్టం కలిగిస్తుంది. మన ఫోన్ కదా అని ఏది పడితే అది డౌన్లోడ్ చేస్తే మన కష్టార్జితం పరుల పాలవుతుంది.
గమనిక: తెలియని వ్యక్తుల నుంచి వచ్చే లింకులను క్లిక్ చేయకండి. ముఖ్యంగా .APK ఫైల్స్ను ఇన్స్టాల్ చేయొద్దు. మీ ఫోన్ సాఫ్ట్వేర్ను ఎప్పుడూ అప్డేట్గా ఉంచుకోండి.
 యాప్స్కు ఇప్పుడు పెద్ద ప్రమాదం వచ్చి పడింది. "డిజిటల్ లూటేరా" అనే కొత్త మాల్వేర్ టూల్కిట్తో హ్యాకర్లు){kind=link}