చెన్నై: బిజేపీయేత‌ర రాజకీయ పక్షాలను ఏకతాటిపైకి తెచ్చే అంశంలో భాగంగా డీఎంకే అధ్యక్షుడు స్టాలిన్‌తో ముఖ్యమంత్రి చంద్రబాబు నాయుడు శుక్ర‌వారం భేటీ అయ్యారు. గన్నవరం విమానాశ్రయం నుంచి చెన్నై బయల్దేరి వెళ్లిన చంద్రబాబు నేరుగా స్టాలిన్‌ నివాసానికి వెళ్లారు. ఈ సందర్భంగా చంద్రబాబుకు డీఎంకే నేతలు ఘనస్వాగతం పలికారు. మోడీ వ్య‌తిరేక కూట‌మి ఏర్పాటులో చంద్రబాబు చేస్తున్న కృషిని స్టాలిన్‌ ఇటీవల స్వాగతించిన విషయం తెలిసిందే. ఈ నేపథ్యంలో సీఎం చంద్రబాబు స్టాలిన్‌ను క‌లవడం ప్రాధాన్యం సంతరించుకుంది. ఈ భేటీలో స్టాలిన్‌తో పాటు డీఎంకే ముఖ్య నేతలు కనిమొళి, టీఆర్‌ బాలు, రాజా పాల్గొన్నారు. చంద్రబాబు వెంట మంత్రులు యనమల, కళా వెంకట్రావు, నక్కా ఆనందబాబు, ఎంపీ సీఎం రమేశ్‌, కనకమేడల రవీంద్రకుమార్‌, మాజీ ఎంపీ కంభంపాటి రామ్మోహన్‌రావు తదితరులు ఉన్నారు.
