తెలంగాణ రాష్ట్ర రోడ్లు భవనాల శాఖ మంత్రిగా కోమటిరెడ్డి వెంకట్రెడ్డి బాధ్యతలు స్వీకరించారు. ఈ సందర్భంగా ఆయన మీడియాతో మాట్లాడారు. తాము ఎవరిమీద కక్ష సాధించాలని అనుకోవడం లేదని కానీ తప్పు చేస్తే మాత్రం శిక్ష తప్పదని హెచ్చరించారు. రోడ్ల నిర్వహణే తమ ప్రాధాన్యత అని స్పష్టం చేశారు. బాధ్యతలు స్వీకరించిన వెంటనే మంత్రి కోమటిరెడ్డి 9 ఫైల్స్పై సంతకాలు చేశారు.
నల్గొండ-ముషంపల్లి-ధర్మాపురం రోడ్ నాలుగు లైన్లకు పెంపు, కొడంగల్, దుడ్యాల రోడ్ల విస్తీర్ణానికి సంబంధించిన ఫైల్పై మంత్రి కోమటిరెడ్డి వెంకట్రెడ్డి సంతకం చేశారు. రేపు ఎంపీగా రాజీనామా చేస్తానని చెప్పారు. సోమవారం రోజున కేంద్ర మంత్రి నితిన్‌ గడ్కరీని కలిసి రాష్ట్ర రోడ్లు గురించి చర్చిస్తానని తెలిపారు. రాష్ట్రంలో 14 రోడ్లకు నేషనల్‌ హైవే హోదా ఇవ్వాలని కోరుతానని వెల్లడించారు. విజయవాడ- హైదరాబాద్ హైవే 6 లైన్లకు పెంచాలని కోరుతామని.. హైదరాబాద్-కల్వకుర్తి రోడ్ 4 లైన్ చేయాలని అడుగుతామని.. ఐదు ఫైల్స్‌ను రేపు గడ్కరీకి చూపించి అనుమతి కోరుతామని మంత్రి స్పష్టం చేశారు.
