ప్రకృతి ఇచ్చిన అద్భుతమైన బహుమతులలో కలబంద (Aloe Vera) ఒకటి. దీని ఆకులో ఉండే జెల్ తరతరాలుగా సౌందర్య సాధనంగా, ఔషధంగా వాడుకలో ఉంది. ఇదొక అద్భుతమైన మల్టీ-టాలెంటెడ్ ప్లాంట్ అని చెప్పచ్చు. చర్మానికి చల్లదనాన్ని ఇవ్వడం నుండి జీర్ణవ్యవస్థను శుభ్రం చేయడం వరకు ఎన్నో అద్భుతాలు చేస్తుంది. అయితే ‘అతి సర్వత్ర వర్జయేత్’ అన్నట్లు, దీన్ని వాడే విధానం, మోతాదు తెలియకపోతే, ప్రయోజనం కంటే నష్టమే ఎక్కువ. మరి కలబంద మనకు ఎప్పుడు మంచి చేస్తుంది? ఎప్పుడు హాని చేస్తుంది? అనేది తెలుసుకుందాం.
కలబంద (అలోవెరా) ప్రధానంగా బాహ్య ఉపయోగంలో అద్భుతాలు చేస్తుంది. ఎండదెబ్బ (Sunburn) తగిలినప్పుడు, స్వల్ప కాలిన గాయాలపై, లేదా చర్మం పొడిబారినప్పుడు దీని జెల్‌ను రాస్తే తక్షణ ఉపశమనం లభిస్తుంది. దీనిలో ఉండే యాంటీఆక్సిడెంట్లు, విటమిన్లు చర్మానికి తేమను అందించి, నొప్పిని మంటను తగ్గిస్తాయి. మొటిమలు, చర్మంపై ఏర్పడిన మచ్చలకు కూడా ఇది మంచి చేస్తుంది.
ఇక అంతర్గత ఉపయోగం విషయానికి వస్తే, అలోవెరా జెల్‌ను కొద్ది మొత్తంలో తీసుకోవడం వల్ల మలబద్ధకం సమస్య తగ్గుతుంది, ఎందుకంటే దీనికి తేలికపాటి భేది గుణం ఉంది. ఇది జీర్ణవ్యవస్థను శుభ్రం చేయడానికి రోగనిరోధక శక్తిని పెంచడానికి కూడా సహాయపడుతుంది.
మంచి చేసే గుణాలతో పాటు, అలోవెరా కొన్ని సందర్భాలలో హాని కూడా కలిగిస్తుంది. ఇక్కడే మనం క్లియర్ గైడ్‌లైన్స్ పాటించాలి. కలబంద ఆకు పైపొర (లేటెక్స్) కింద ఉండే పసుపు రంగులో ఉండే పదార్ధం (Aloe Latex) చాలా ఘాటైన ఉంటుంది. దీన్ని ఎక్కువ మోతాదులో తీసుకుంటే, తీవ్రమైన కడుపు నొప్పి డయేరియా మరియు శరీరంలో నీటి శాతం తగ్గిపోవడం జరగవచ్చు.
గర్భిణీ స్త్రీలు, పాలిచ్చే తల్లులు మరియు జీర్ణ సమస్యలు ఉన్నవారు దీని లేటెక్స్‌ను అస్సలు తీసుకోకూడదు. ఇంట్లో పెరిగే కలబందను నేరుగా వాడేటప్పుడు, ఆ పసుపు రంగు ద్రవాన్ని పూర్తిగా తొలగించి, కేవలం తెల్లటి జెల్‌ను మాత్రమే ఉపయోగించడం సురక్షితం. అలాగే చర్మానికి రాసే ముందు కొందరికి అలెర్జీ టెస్ట్ చేసుకోవడం మంచిది. మార్కెట్‌లో లభించే అలోవెరా జ్యూస్‌లు ప్రాసెస్ చేయబడినవి కాబట్టి వాటిని మోతాదుకు మించి వాడకూడదు.
గమనిక: అలోవెరా జెల్‌ను నోటి ద్వారా తీసుకునే ముందు, వాణిజ్యపరంగా లభించే, శుద్ధి చేసిన ఉత్పత్తులను ఎంచుకోవడం ఉత్తమం. ఇంట్లో పెరిగే కలబందను అంతర్గతంగా ఉపయోగించడానికి ముందు దాని పసుపు ద్రవాన్ని పూర్తిగా తొలగించడం తప్పనిసరి.
