వంశీకృష్ణ దర్శకత్వంలో మాస్ మహారాజ్ రవితేజ హీరోగా నటిస్తున్న లేటెస్ట్ పాన్ ఇండియా ప్రాజెక్ట్ టైగర్ నాగేశ్వరరావు. ఆంధ్రప్రదేశ్ లోని బాపట్ల సమీపంలో ఉండే స్టువర్టుపురానికి చెందిన గోకరి నాగేశ్వరరావు అనే ఓ దొంగ నిజ జీవిత కథ ఆధారంగా ఈ చిత్రం రూపొందుతోంది. ఈ చిత్రంలో రవితేజ దొంగగా కనిపించబోతుండగా.. రవితేజ కెరీర్ లోనే అత్యంత భారీ బడ్జెట్ అండ్ ఫస్ట్ పాన్ ఇండియా ఫిలిం గా ఈ చిత్రం రాబోతుంది.
అభిషేక్ అగర్వాల్ ఆర్ట్స్ ఫిలిం ప్రొడక్షన్స్ ఆధ్వర్యంలో అభిషేక్ అగర్వాల్ నిర్మాతగా వంశీకృష్ణ దర్శకత్వంలో ఈ చిత్రం అక్టోబర్ 20, 2023న ప్రేక్షకుల ముందుకి రాబోతోంది. అయితే తాజాగా ఈ మూవీ యూనిట్ కి షాక్ తగిలింది. ఈ సినిమా విడుదలను నిలిపివేయాలని బాపట్ల జిల్లా స్టువర్టుపురం ప్రజలు ఆందోళన చేపట్టారు. ప్రస్తుతం స్టువర్టుపురం గ్రామంలో నేరాలు చేసే వారు లేరని.. ఈ సినిమా ద్వారా తమ గ్రామానికి చెడ్డ పేరు వస్తుందని వారు ఆరోపిస్తున్నారు. సినిమా విడుదలపై హైకోర్టును ఆశ్రయించామని.. మరో రెండు రోజులలో తీర్పు వచ్చిన తరువాత తదుపరి కార్యాచరణ ఉంటుందని అంటున్నారు.
