అరుణాచల్ప్రదేశ్పై వితండవాదం చేస్తున్న డ్రాగన్ దేశం మరోసారి అర్థంలేని వ్యాఖ్యలు చేసింది. కేంద్ర హోంమంత్రి అమిత్ షా అరుణాచల్ ప్రదేశ్లో పర్యటించడంపై అభ్యంతరం వ్యక్తం చేసింది. ఆ ప్రాంతం తమదే కాబట్టి.. అమిత్ షా పర్యటన తమ దేశ సార్వభౌమత్వానికి విఘాతం కలిగిస్తోందని వ్యాఖ్యానించింది.
‘జాంగ్నాన్ (అరుణాచల్కు చైనా పెట్టిన పేరు) చైనా భూభాగం కిందకు వస్తుంది. ఈ భూభాగంలో భారత అధికార వర్గాల కార్యకలాపాలు చైనా సార్వభౌమత్వానికి విఘాతం కలిగిస్తున్నాయి. సరిహద్దులో శాంతి, సుస్థిరతలకు ఇది మంచిది కాదు. మేం దీన్ని వ్యతిరేకిస్తున్నాం’ అంటూ చైనా విదేశాంగ శాఖ ప్రతినిధి వాంగ్ వెన్బిన్ చెప్పుకొచ్చారు.
మరోవైపు సోమవారం రోజున అరుణాచల్ ప్రదేశ్లో పర్యటించిన అమిత్ షా.. దుందుడుకు చైనాకు పరోక్షంగా గట్టి హెచ్చరికలు జారీ చేశారు. భారత భూభాగాన్ని ఎవరైనా ఆక్రమించుకోవచ్చనే కాలం గడిచిపోయిందని వ్యాఖ్యానించారు. భారత సరిహద్దుల వైపు ప్రత్యర్థులెవరూ కన్నెత్తి చూడలేరని అన్నారు. భారత్కు చెందిన అంగుళం భూమిని కూడా ఎవరూ ఆక్రమించుకోలేరని స్పష్టం చేశారు.
