ఖలిస్థానీ అనుకూల నాయకుడు, ‘వారీస్ పంజాబ్ దే’ చీఫ్ అమృత్పాల్ సింగ్ అరెస్టు వ్యవహారం విషయం చర్చనీయాంశంగా మారింది. అతడు చిక్కినట్టే చిక్కి తప్పించుకున్నాడని పోలీసులు చెబుతుండగా.. వారీస్ పంజాబ్ దే లీగల్ అడ్వైజర్ మాత్రం వాటిని ఖండిస్తున్నారు. అమృత్పాల్ను పోలీసులు అరెస్ట్ చేశారని.. ఫేక్ ఎన్కౌంటర్లో హత్యకు ప్లాన్ చేశారని న్యాయవాది ఇమాన్ సింగ్ ఖారా ఆరోపిస్తున్నారు. షాకోఠ్ పోలీస్ స్టేషన్ వద్ద అతడిని అరెస్ట్ చేసినట్లు చెబుతున్నారు. అమృత్పాల్ ప్రాణాలకు ముప్పు ఉందని ఆందోళన వ్యక్తం చేస్తూ పంజాబ్, హరియాణా హైకోర్టును ఆశ్రయించారు.
“హైకోర్టులో నేను రిట్ పిటిషన్ వేశా. రాజ్యాంగంలోని ఆర్టికల్ 21 ప్రకారం ఏ వ్యక్తినీ పోలీసులు కొట్టకూడదు. అమృత్పాల్ను షాకోఠ్ పోలీస్ స్టేషన్ వద్ద అరెస్ట్ చేశారు. అతడి ప్రాణాలకు ముప్పు ఉంది. ఇదే విషయం హైకోర్టు పిటిషన్లో ప్రస్తావించా. ఎవరినైనా అరెస్ట్ చేస్తే.. 24 గంటల లోపు వారిని కోర్టులో ప్రవేశపెట్టాలి. ఇది పోలీసుల విధి. కానీ, ఇప్పటివరకు అమృత్పాల్ను కోర్టుకు తీసుకురాలేదు. పోలీసులకు ఏదో దురుద్దేశం ఉన్నట్లు కనిపిస్తోంది. పోలీసులు ఫేక్ ఎన్కౌంటర్లో అతడిని చంపేయవచ్చు. తమకు దొరికిన ఈ టైమ్ను ఉపయోగించుకొని ఏదైనా పథకం రచించే ఛాన్స్ ఉంది.”
-ఇమాన్ సింగ్ ఖారా, వారీస్ పంజాబ్ దే లీగల్ అడ్వైజర్
