చంద్రబాబును ముఖ్యమంత్రిని చేసేందుకే పవన్ కళ్యాణ్ టిడిపి తో పొత్తు పెట్టుకుంటున్నారని విమర్శించారు అనంతపురం జిల్లా ఇన్చార్జి మంత్రి పెద్దిరెడ్డి రామచంద్రారెడ్డి. నేడు అనంతపూర్ లోని రూరల్ నాగిరెడ్డిపల్లి గ్రామంలో నిర్వహించిన ఓ కార్యక్రమంలో పాల్గొన్న మంత్రి పెద్దిరెడ్డి మాట్లాడుతూ.. రాష్ట్రంలో ఎన్ని పార్టీలు కలసి వచ్చినా తాము ఒంటరిగానే బరిలోకి దిగుతున్నట్లు వెల్లడించారు. తెలుగుదేశం – జనసేన పార్టీలు పొత్తులు పెట్టుకుంటే చూసి వైసిపి పార్టీ భయపడే అవసరం లేదన్నారు.
2024 లో కూడా సీఎం జగన్ సారథ్యంలోనే వైసిపి పార్టీ ఒంటరిగా పోటీ చేస్తుందని స్పష్టం చేశారు. ముందు పవన్ కళ్యాణ్ పోటీ చేస్తే గెలుస్తారో లేదో ఆలోచన చేసుకోవాలని ఎద్దేవా చేశారు. రాజకీయంగా పరిజ్ఞానం లేని వ్యక్తి లోకేష్ అని.. అతని గురించి మాట్లాడలేనని అన్నారు. వైసీపీకి 2019లో వచ్చిన 151 సీట్ల కంటే 2024లో ఎక్కువ ఎమ్మెల్యే సీట్లు సాధిస్తామని క్లారిటీ ఇచ్చారు.
