ఇసుక సిమెంట్, స్టీల్, కూలి ధరలు పెరిగిన కారణంగా ఒక్కొక్క ఇంటికి కనీసం రూ.3.50 లక్షలవుతుందని తులసిరెడ్డి తెలిపారు. ప్రభుత్వం ఒక్కొక్క ఇంటికి రూ.3.50 లక్షలు ఇవ్వాలని పేర్కొన్నారు. జగన్ సర్కార్ 2019-2020 ఆర్థిక సంవత్సరంలో ఇళ్ల నిర్మాణానికి బడ్జెట్‌లో రూ.3 వేల 671 కోట్లు కేటాయించి రూ.964 కోట్లు (27 శాతం) ఖర్చు చేసిందని చెప్పారు. 2020-2021 ఆర్థిక సంవత్సరంలో రూ.3,692 కోట్లు కేటాయించి రూ.1,510 కోట్లు (41 శాతం) ఖర్చు చేసిందన్నారు. ఈ ఆర్థిక సంవత్సరం 2021-2022 బడ్జెట్ లో రూ.4,715 కోట్లు మాత్రమే కేటాయించిందని వ్యాఖ్యానించారు. కానీ ఈ రోజు ప్రకటనల్లో 2022 జూన్ నాటికి రూ.28,084 కోట్లతో 15,60,227 ఇళ్లు నిర్మిస్తామని ప్రభుత్వం చెప్పిందని, బడ్జెట్ కేటాయింపులే రూ.4,715 కోట్లు కాగా, రూ.28,084 కోట్లు ఖర్చు చేస్తామనడం పిట్టల దొర కోతలు కాదా..? అని తులసిరెడ్డి ప్రశ్నించారు.
