విజయ్ దేవరకొండ హీరోగా సందీప్ రెడ్డి దర్శకత్వంలో వచ్చిన అర్జున్ రెడ్డి చిత్రం ఎంత సంచలనం సృష్టించిందో అందరికీ తెలిసిందే. ఈ సినిమాతో విజయ్ దేవరకొండ స్టార్ గా మారిపోయాడు. దర్శకుడు సందీప్ వంగాకి బాలీవుడ్ లో అవకాశం వచ్చింది. కబీర్ సింగ్ పేరుతో బాలీవుడ్ లో రీమేక్ అయిన ఈ చిత్రానికి కలెక్షన్ల వర్షం కురిసింది. దేశవ్యాప్తంగా సంచలనం సృష్టించిన ఈ చిత్రాన్ని తమిళంలో ఆదిత్య వర్మగా రీమేక్ అయ్యింది.
హీరో విక్రమ్ కుమారుడు ధృవ్ విక్రమ్ ఇందులో హీరోగా నటించాడు. కొత్త దర్శకుడు గిరీశాయ ఈ చిత్రాన్ని తెరకెక్కించాడు. థియేటర్లలో రిలీజైన ఈ చిత్రానికి తమిళంలోనూ మంచి స్పందన వచ్చింది. ఐతే నిజానికి ఈ సినిమాని తమిళంలో రీమేక్ చేయాలని భావించినపుడు దర్శకుడు బాలాని సంప్రదించారు. బాలా ఈ చిత్రాన్ని వర్మ పేరుతో తెరకెక్కించాడు. కానీ ఈ సినిమా రిలీజ్ కాలేదు. కొన్ని కారణాల వల్ల మళ్ళీ ఈ రీమేక్ ని గిరీశాయ దర్శకుడితో తెరకెక్కించారు.
ఐతే బాలా తెరకెక్కించిన వర్మ ప్రస్తుతం ఓటీటీలో విడుదలకి సిద్ధం అవుతోంది. ఈ మేరకు అధికారిక ప్రకటన కూడా వచ్చింది. సింప్లీ సౌత్ అనే యాప్ ద్వారా బాలా దర్శకత్వం వహించిన అర్జున్ రెడ్డి రీమేక్, వర్మ చిత్రం అక్టోబర్ 6వ తేదీ నుండి అందుబాటులో ఉండనుంది.
