మైక్రోసాఫ్ట్ సహ వ్యవస్థాపకుడు, ప్రపంచ కుబేరుల్లో ఒకరైన బిల్ గేట్స్, తన కుమార్తె జెన్నిఫర్ గేట్స్‌కు భారీ బహుమతిగా 15.82 మిలియన్ డాలర్ల విలువైన గుర్రపుశాలను (హార్స్ ఫామ్) కొనుగోలు చేసి ఇచ్చినట్లు వార్తలు వెలువడ్డాయి. 2018లో జెన్నిఫర్ స్టాన్‌ఫోర్డ్ యూనివర్సిటీ నుంచి గ్రాడ్యుయేషన్ పూర్తి చేసుకున్న సమయంలో ఈ బహుమతిని అందుకున్నారు. దీనికి సంబంధించి న్యూయార్క్ పోస్ట్, ది జర్నల్ న్యూస్ కథనాలు ప్రచురించాయి. ఈ విలాసవంతమైన ఎస్టేట్ న్యూయార్క్‌లోని నార్త్ సేలం, వెస్ట్‌చెస్టర్ ప్రాంతంలో ఉంది. సుమారు 124 ఎకరాల విస్తీర్ణంలో ఉన్న ఈ హార్స్ ఫామ్‌లో గుర్రపు స్వారీకి అవసరమైన అత్యుత్తమ సౌకర్యాలు అందించబడినట్లు తెలుస్తోంది. ఈ ఎస్టేట్‌ను రియల్ ఎస్టేట్ డెవలపర్, డంకన్ డేటన్ నుండి ఆఫ్-మార్కెట్ డీల్ ద్వారా కొనుగోలు చేసినట్లు సమాచారం.
జెన్నిఫర్ గేట్స్ చిన్నప్పటి నుంచి గుర్రపు స్వారీ పట్ల ఆసక్తి చూపించారు. ఆమె ప్రస్తుతం న్యూయార్క్ యూనివర్సిటీలో ఉన్నత విద్యను అభ్యసిస్తున్నారు. ఈ నార్త్ సేలం ఎస్టేట్‌లో అత్యాధునిక స్టేబుల్స్, శిక్షణా సౌకర్యాలు ఉన్నాయి. జెన్నిఫర్, ఈక్వెస్ట్రియన్‌గా రాణించాలనే లక్ష్యంతో ఉన్నారు. ఈ బహుమతిని ఇచ్చిన తర్వాత, బిల్ గేట్స్ మరో విలాసవంతమైన ఈక్వెస్ట్రియన్ ఎస్టేట్‌ను ఫ్లోరిడాలో కూడా కొనుగోలు చేసినట్లు సమాచారం. అయితే, జెన్నిఫర్‌కు ఇంతటి ఖరీదైన బహుమతి ఇవ్వడం ప్రస్తుతం చర్చనీయాంశంగా మారింది. బిల్ గేట్స్ మాజీ భార్య, మెలిండా గేట్స్, తమ పిల్లలను సాధారణమైన, ఆర్థిక క్రమశిక్షణతో పెంచినట్టు చాలా సార్లు వెల్లడించారు. 2024లో, న్యూయార్క్ టైమ్స్‌కు ఇచ్చిన ఇంటర్వ్యూలో, “మేము వారికి అడిగినవన్నీ కొనివ్వలేదు,” అని మెలిండా పేర్కొన్నారు. జెన్నిఫర్‌కు బిల్ గేట్స్ ఇచ్చిన ఈ భారీ బహుమతితో, పిల్లల పెంపకంలో గేట్స్ కుటుంబంలో ఉన్న విలువల మధ్య ఉన్న వివాదం మరోసారి చర్చకు వస్తోంది.
