రాష్ట్రంలో ఏ ఎన్నిక వచ్చినా టీఆర్ఎస్ దే గెలుపని, యావత్ సమాజం కేసీఆర్ వెంటేనని మునుగోడుతో మరోసారి రుజువైందని అన్నారు ఖమ్మం పార్లమెంటు సభ్యులు నామా నాగేశ్వర రావు. సీఎం కేసీఆర్ భరోసాతో మునుగోడు ప్రజలు చరిత్రాత్మక తీర్పు ఇచ్చారని అన్నారు. మునుగోడు ఉప ఎన్నికల్లో టీఆర్ఎస్ ప్రభంజనం ముందు ఊహించిందేనన్నారు.
మొదటి రౌండ్ నుంచి మంచి ఆధిక్యాన్ని ప్రదర్శించి ఘన విజయంతో విజయకేతనం ఎగురవేసిన కూసుకుంట్ల ప్రభాకర్ రెడ్డికి అభినందనలు తెలియజేశారు. ప్రలోభాలకు లొంగకుండా టీఆర్ఎస్ కు పట్టం కట్టిన మునుగోడు ఓటర్లకు అభినందనలు తెలిపారు నామా నాగేశ్వరరావు. మునుగోడు ఫలితంతో దేశంలో బీఆర్ఎస్ జైత్రయాత్ర ప్రారంభం కాబోతుందన్నారు. ప్రత్యర్థి పార్టీలు ఎన్ని కుట్రలు, కుతంత్రాలు చేసినా పటాపంచలు చేసి, టీఆర్ఎస్ అద్భుత విజయాన్ని సొంతం చేసుకుందన్నారు.
