ఈ రోజుల్లో చాలా మంది యువతులు ఎదుర్కొంటున్న అతి సాధారణ ఆరోగ్య సమస్య PCOS (Polycystic Ovary Syndrome). ఇది కేవలం పెద్ద వారి సమస్య మాత్రమేనా? యుక్తవయస్సులోకి అడుగుపెడుతున్న టీనేజ్ అమ్మాయిలకు కూడా దీని ప్రమాదం ఉంటుందా? చిన్న వయసులోనే ఈ సమస్య వస్తే ఎలాంటి మార్పులు వస్తాయి? తల్లిదండ్రులు, యువతులు తెలుసుకోవాల్సిన ముఖ్య విషయాలు ఏమిటి? ఈ ప్రశ్నలకు సమాధానాలు తెలుసుకుంటూ టీనేజ్ దశలో PCOS గురించి పూర్తి అవగాహన పెంచుకుందాం.
PCOS (పాలీసిస్టిక్ ఓవరీ సిండ్రోమ్) అనేది కేవలం పెద్ద వారిలో మాత్రమే కాకుండా టీనేజ్ అమ్మాయిలలో కూడా వచ్చే అవకాశం ఉంది. బాలికలు యుక్తవయస్సు లోకి ప్రవేశించిన తర్వాత అంటే వారి మొదటి పీరియడ్స్ వచ్చిన తర్వాత ఏ సమయంలోనైనా ఈ సిండ్రోమ్ అభివృద్ధి చెందవచ్చు. హార్మోన్ల మార్పులు సహజంగా ఉండే ఈ దశలో PCOS లక్షణాలను గుర్తించడం కొన్నిసార్లు కష్టంగా ఉంటుంది. ఈ సమస్య రావడానికి ప్రధాన కారణాలు తెలుసుకోవటం ముఖ్యం.
ఇన్సులిన్ నిరోధకత: శరీర కణాలు ఇన్సులిన్‌కు సరిగా స్పందించకపోవడం వల్ల ఇన్సులిన్ స్థాయిలు పెరిగి, ఇది ఆండ్రోజెన్ ఉత్పత్తిని ప్రేరేపించడం. ముఖ్యంగా ఆండ్రోజెన్ (మగ హార్మోన్లు) స్థాయిలు పెరగడం.
వంశపారంపర్యత: కుటుంబంలో ఎవరికైనా PCOS లేదా టైప్-2 డయాబెటిస్ వంటి సమస్యలు ఉంటే, వచ్చే అవకాశం ఎక్కువ. అంతేకాక అనారోగ్యకరమైన ఆహారపు అలవాట్లు, అధిక బరువు, శారీరక శ్రమ లేకపోవడం వంటి ఆధునిక జీవనశైలి మార్పులు ఈ సమస్యను వేగవంతం చేస్తున్నాయి.
యుక్తవయస్సులో PCOS లక్షణాలు, గుర్తించే విధానం: టీనేజ్‌లో PCOS యొక్క లక్షణాలు కొంచెం భిన్నంగా లేదా ఇతర యుక్తవయస్సు మార్పుల వలె అనిపించవచ్చు. అయినప్పటికీ వీటిని గమనించడం చాలా ముఖ్యం. సాధారణంగా కనిపించే లక్షణాలు క్రమరహిత పీరియడ్స్, ఋతుస్రావం అరుదుగా రావడం (సంవత్సరంలో 8 సార్ల కంటే తక్కువ), లేదా పీరియడ్స్ మధ్య ఎక్కువ గ్యాప్ ఉండటం. అయితే యుక్తవయస్సులో మొదటి రెండు సంవత్సరాలు పీరియడ్స్ అస్తవ్యస్తంగా ఉండటం సాధారణమే కానీ ఆ తర్వాత కూడా క్రమం తప్పితే అనుమానించాలి.
అధిక రోమాలు : అమ్మాయిల ముఖం ఛాతీ, వీపు లేదా పొత్తికడుపు వంటి భాగాలలో మగవారిలాగా దట్టంగా వెంట్రుకలు పెరగడం.
మొటిమలు : ఎంతకీ తగ్గని తీవ్రమైన మొటిమలు, ముఖ్యంగా దవడ మరియు గడ్డం ప్రాంతంలో రావడం. ముఖ్యంగా నడుము చుట్టూ బరువు పెరగడం. మెడ, చంకలు లేదా గజ్జల దగ్గర చర్మం నల్లగా మందంగా మారడం.
ఈ లక్షణాలు కనిపించిన వెంటనే వైద్య నిపుణులను (గైనకాలజిస్ట్ లేదా ఎండోక్రినాలజిస్ట్) సంప్రదించాలి. సరైన సమయంలో రోగ నిర్ధారణ చేసి జీవనశైలి మార్పులు మరియు అవసరమైతే చికిత్స తీసుకోవడం ద్వారా PCOS ను సమర్థవంతంగా నియంత్రించవచ్చు, భవిష్యత్తులో వచ్చే సంతానలేమి డయాబెటిస్ వంటి సమస్యల ప్రమాదాన్ని తగ్గించవచ్చు.
చిన్న వయసులో PCOS నిర్ధారణ భయం కలిగించినా, సరైన అవగాహన శ్రద్ధ వహిస్తే దీనిని సులభంగా నిర్వహించవచ్చు. ఆరోగ్యకరమైన ఆహారం (పండ్లు, కూరగాయలు, తక్కువ కార్బోహైడ్రేట్లు) క్రమం తప్పకుండా వ్యాయామం మరియు సరైన నిద్ర,ఈ మూడు అంశాలపై దృష్టి పెట్టడం ద్వారా యువతులు తమ హార్మోన్లను సమతుల్యం చేసుకోవచ్చు. తల్లిదండ్రులు తమ కుమార్తెలలో వచ్చే శారీరక మార్పులను గమనిస్తూ వారికి మానసిక మద్దతునివ్వడం ఈ ప్రయాణంలో అత్యంత కీలకం.
గమనిక: పీరియడ్స్ క్రమం తప్పడం, లేదా అవాంఛిత రోమాలు పెరగడం వంటి లక్షణాలు కనిపిస్తే, ఆలస్యం చేయకుండా వైద్యుడిని సంప్రదించండి.
