ఆంధ్రప్రదేశ్ కున్న అతి పెద్ద సమస్య ముఖ్యమంత్రి జగన్ అని టిడిపి అధినేత చంద్రబాబు విమర్శించారు. సీఎం జగన్ ఓడిపోతేనే రాష్ట్రం బాగుపడుతుందని తన అభిప్రాయాన్ని వ్యక్తం చేశారు చంద్రబాబు. టిడిపి ఎప్పుడు జాతీయ భావంతోనే ఉండే పార్టీ అని జాతీయ రాజకీయాలతో పార్టీకి ప్రత్యేక అనుబంధం ఉందన్నారు. ప్రత్యేక హోదా అంశంపై కేంద్రంతో విభేదించినట్లు చెప్పారు. మిగతా విషయాల్లో కేంద్రంతో ఎలాంటి భేదాభిప్రాయాలు లేవని వెల్లడించారు.
విభజన గాయాల కంటే దారుణంగా జగన్ రాష్ట్రాన్ని నాశనం చేశారని ధ్వజమెత్తారు చంద్రబాబు. మరోవైపు రాష్ట్రంలో పొత్తుల గురించి మాట్లాడారు చంద్రబాబు. అన్ని కుదిరితే ఏపీలో పొత్తులు ఉంటాయని స్పష్టం చేశారు. తెలంగాణలో మాత్రం ఒంటరిగానే పోటీకి వెళ్తామని చెప్పారు. బిజెపితో కలిసి వెళ్లడానికి సమయం మించిపోయిందని.. ఎవరు ఎన్ని స్థానాల్లో పోటీ చేయాలనే విషయాలపై కమిటీ ఏర్పాటు చేస్తామని వెల్లడించారు.
