ఆ మాజీ రెవెన్యూ అధికారి సంపాదన ఎంతో తెలుసా?

ఏపీ విభజన తరువాత విజయవాడ ప్రాంతంలో పనిచేసిన ఒక ఎమ్మార్వో సంపాదన గిన్నీస్ రికార్డుల్లోకి ఎక్కుతుందని ఈ ప్రాంత రైతులు బాహాటంగా చెప్పుకుంటున్నారు. సీఆర్డిఏ పరిధిలో ప్రభుత్వం చేసిన భూ సమీకరణలో తిమ్మిని బమ్మి, బమ్మిని తిమ్మి చేసిన ఆ రెవెన్యూ అధికారి వందల కోట్లు వెనుకేసుకున్నారని, చిన్న, సన్నకారు, దళిత రైతుల జేబులు కొట్టి ప్రభుత్వ పెద్దలు, తిమింగళాలకు ఎరవేసి… వందల కోట్లు వెనుకేసుకున్నారని చెబుతున్నారు. ప్రభుత్వంలోని కొంతమంది పెద్దలు, ఏకంగా సీఎంస్థాయి వ్యక్తి వద్దకు కూడా ఆ మాజీ ఎమ్మార్వో ఎలాంటి ముందస్తు అపాయింట్మెంట్ లేకుండా వెళ్లగలిగేవారని చెబుతున్నారు. అసైన్డ్, ఇనాం భూముల రికార్డుల తారుమారులో వందల కోట్ల స్కాం జరిగిందని, ఈ స్కాంలో ఆ మాజీ ఎమ్మార్వో వందల కోట్లు కూడపెట్టారని అంటున్నారు. తనకు సర్వీసు ఇంకా ఉండగానే నోట్లు లెక్కబెట్టుకోవాలనే ఆశ, ఆశయంతో వీఆర్ ఎస్ తీసుకున్న ఆ మాజీ రెవెన్యూ అధికారిని ప్రభుత్వంలోని పెద్దలు వారికి చేసిన సహాయానికి ప్రతి సహాయంగా మరో ప్రభుత్వ కార్పొరేషన్ లో మంచి పదవి, జీతం ఇచ్చి సేవలు కొనసాగిస్తున్నారని రైతులు లబోదిబోమంటున్నారు. తక్కువలో తక్కువ ఆ మాజీ ఎమ్మార్వో 500 కోట్లు వెనుకేసుకున్నారని, వచ్చే ఎన్నికల్లో జగన్ సీఎం అయితే అతనిపైనే ఏసీబీ దాడులు జరుగుతాయని గ్రహించే సర్వీసు ఉన్నా వీఆర్ ఎస్ తీసుకున్నట్లు ఈప్రాంతరైతులు చెబుతున్నారు. అవున్లే ఆవు చేన్లో మేస్తే…దూడ గట్టున మేస్తుందా?