ఓడలు బళ్ళవుతాయి.. బళ్ళు ఓడలవుతాయి అంటే ఇదే కావచ్చు. కాలం కలసిసోచ్చి ఓ రైతు రాత్రికి రాత్రే లక్షాధికారి అయ్యాడు. ఈ ఘటన మధ్యప్రదేశ్‌లోని పన్నా జిల్లాలో చోటు చేసుకుంది. ఓ భూమిని ప్రతాప్ సింగ్ అనే రైతు లీజుకు తీసుకుని 3 నెలలుగా వజ్రాల కోసం తవ్వుతున్నాడు. ఈ క్రమంలో తాజాగా అతడికి 11.88 క్యారెట్ల బరువున్న వజ్రం దొరికింది. ఈ విషయాన్ని వజ్రాల కార్యాలయం అధికారి రవి పటేల్ వెల్లడించారు. అంతేకాకుండా.. ఈ వజ్రం ఎంతో నాణ్యంగా ఉందని.. అదృష్టం ఎప్పుడు ఎలా వరిస్తుందో చెప్పలేమన్నారు. మూడు నెలల కష్టానికి ప్రతిఫలం దక్కిందని.. రైతు ప్రతాప్ సింగ్ యాదవ్ అన్నారు.
ఈ సందర్భంగా రైతు ప్రతాప్ సింగ్ మాట్లాడుతూ.. తనకు దొరికిన వజ్రాన్ని డైమండ్ కార్యాలయంలో అప్పగించినట్లు పేర్కొన్నారు. వేలంలో వచ్చిన డబ్బుతో ఏదైనా వ్యాపారం పెట్టుకుంటాన్న ప్రతాప్ సింగ్.. అలాగే, తన పిల్లల చదువుల కోసం కొంత ఖర్చు చేస్తానని వివరించాడు. ఈ వజ్రాన్ని వేలం వేయడం ద్వారా వచ్చిన సొమ్ములో రాయల్టీ, పన్నులు మినహాయించుకుని మిగతా మొత్తాన్ని ప్రభుత్వం రైతుకు అందజేయనుంది. అయితే సుమారు రూ.50లక్షల వరకు రైతు ప్రతాప్‌సింగ్‌కు అందుతుందని అంచనా వేస్తున్నారు అధికారులు.
