బీబీసీ ఇండియన్ స్పోర్ట్స్ వుమన్ ఆఫ్ ది ఇయర్ అవార్డుకు గాను నిఖత్ జరీన్ నామినేట్ కాగా.. వెయిట్‌ లిఫ్టర్‌ మీరాబాయి చాను ఈ అవార్డును అందుకున్నది. దేశ రాజధాని ఢిల్లీలో బీబీసీ ఇండియన్ స్పోర్ట్స్ వుమన్ ఆఫ్ ది ఇయర్ అవార్డుల ప్రదాన కార్యక్రమం జరిగింది. ఈ అవార్డుకు వెయిట్‌ లిఫ్టర్‌ మీరాబాయి చాను, రెజర్లు సాక్షి మాలిక్‌, వినేశ్‌ ఫోగట్‌, షట్లర్‌ పీవీ సింధు, బాక్సర్‌ నిఖత్ జరీన్ నామినేట్ అయ్యింది. కార్యక్రమంలో బీఆర్‌ఎస్‌ ఎమ్మెల్సీ కల్వకుంట్ల కవిత, ఆర్‌ఎల్‌డీ జాతీయ అ ధ్యక్షుడు, ఎంపీ జయంత్‌ చౌదరి, ఆర్‌జీడీ ఎంపీ మనోజ్‌ ఝుజే, జేడీయూ మాజీ ఎంపీ కేసీ సింగ్‌, ఆప్‌ ఎంపీ సంజయ్‌ సింగ్‌ హాజరయ్యారు. కార్యక్రమంలో నిఖత్ జరీన్ తరఫున ఆమె తండ్రి ఎండీ జమీల్ హాజరయ్యారు.
ఈ సందర్భంగా వేదికపై భావోద్వేగానికి గురయ్యారు. నిఖత్ జరీన్ ఈ స్థాయిలో ఉండడానికి సీఎం కేసీఆర్‌, ఎమ్మెల్సీ కవిత ప్రోత్సాహం, సహకారమే ప్రధాన కారణమన్నారు. ఒక తండ్రిగా నేను చేసింది కొంతేనన్న జమీల్, సీఎం కేసీఆర్‌, కవిత సహకారం లేకపోతే నిఖత్ జరీన్ ఈ స్థాయికి వచ్చేది కాదన్నారు. జమీల్ అహ్మద్ ప్రసంగానికి సభికులు చప్పట్లతో హర్షధ్వానాలు తెలిపారు. నిజామాబాద్ జిల్లాకు చెందిన నిఖత్ జరీన్ అంతర్జాతీయ, జాతీయ వేదికల మీద జరిగిన అనేక బాక్సింగ్ పోటీల్లో సత్తా చాటింది.
