భారత్‌పై దాడి చేయడానికి పాకిస్తాన్ చేసిన ప్రయత్నాలను భారత రక్షణ దళాలు సమర్థవంతంగా తిప్పికొట్టాయి. పాక్ ప్రయోగించిన మిస్సైళ్లను భారత వైమానిక భద్రతా వ్యవస్థ గాల్లోనే వినాశనం చేసింది. దీనికి ప్రతిస్పందనగా, భారత్ డ్రోన్ల సాయంతో పాక్‌లోని కీలక స్థావరాలపై ప్రతీకార దాడులకు దిగింది. లాహోర్‌లోని ప్రధాన ఎయిర్ డిఫెన్స్ సిస్టమ్‌ను భారత డ్రోన్లు ధ్వంసం చేసినట్టు సమాచారం. అంతేకాక, పాక్ ఆర్మీ ప్రధాన కేంద్రంగా ఉన్న రావల్పిండిపై కూడా డ్రోన్ దాడులు జరిగినట్టు తెలుస్తోంది.
రావల్పిండిలోని క్రికెట్ స్టేడియం సమీపంలో ఓ డ్రోన్ కూలినట్టు నివేదికలు చెబుతున్నాయి. ఈ ఘటనలో స్టేడియంతో పాటు సమీపంలోని రెస్టారెంట్ దెబ్బతినగా, ఇద్దరు వ్యక్తులు గాయపడ్డారు. వారు ప్రస్తుతం ఆసుపత్రిలో చికిత్స పొందుతున్నారు. ఈ రాత్రి రావల్పిండిలో పీఎస్ఎల్ క్రికెట్ మ్యాచ్ జరగాల్సి ఉన్నప్పటికీ, డ్రోన్ దాడుల నేపథ్యంలో మ్యాచ్ నిర్వహణపై అనిశ్చితి ఏర్పడింది. భారత్-పాక్ మధ్య ఉద్రిక్తతల నేపథ్యంలో మిగతా పీఎస్ఎల్ మ్యాచ్‌లను దుబాయ్‌కు తరలించే అవకాశాన్ని పాక్ క్రికెట్ బోర్డు పరిగణనలోకి తీసుకుంటున్నట్టు సమాచారం.
