ప్ర‌ణ‌య్‌రాయ్ సార‌ధ్యంలోని టీవీ చానెల్ గ్రూప్ `న్యూఢిల్లీ టెలివిజ‌న్ లిమిటెడ్ (ఎన్డీటీవీ – NDTV) ను భారత సంపన్నుడు గౌతం అదానీ టేకోవర్ చేశారు. ఈ టేకోవర్ ఒక బాధ్య‌త అని ఇండియ‌న్ బిలియ‌నీర్ గౌతం అదానీ చెప్పుకొచ్చారు. అయితే.. దీంతో.. ఎన్డీటీవీని ట్విట్టర్ లో అన్ ఫాలో చేస్తున్నట్లు మంత్రి కేటీఆర్ వెల్లడించారు. ఈ మేరకు ట్విట్టర్లో ట్వీట్ చేశారు. ఇప్పటి వరకు చేసిన మంచి పనికి ధన్యవాదాలు అనే క్యాప్షన్ తో కేటీఆర్ ఈ ట్వీట్ చేశారు. కాగా NDTVలో మెజార్టీ వాటా గౌతమ్ అదానీ దక్కించుకోవడంతో కో ఫౌండర్ ప్రణయ్ రాయ్ ఆయన భార్య రాధికా రాయ్ రాజీనామా చేశారు.
వాళ్ల స్థానంలో సుదీప్త భట్టాచార్య, సంజయ్ పుగాలియా, సెంథిల్ సిన్నయ్య చెంగల్వరాయన్ – కంపెనీ బోర్డులో కొత్త డైరెక్టర్లుగా ఎంపికయ్యారు. ప్రస్తుతం NDTV లో అదానీ వాటా 55.18 శాతానికి చేరింది. అదానీ గ్రూప్ కొనుగోలు చేసిన విశ్వప్రదాన్‌ కమర్షియల్‌ ప్రైవేట్‌ లిమిటెడ్ (VCPL) సంస్థ గతంలో NDTVకి రుణం ఇచ్చింది. ఆ రుణాన్ని NDTVలో వాటాగా అదానీ గ్రూప్ మార్చుకుంది. దీనికి అదనంగా 26 శాతం వాటాల కొనుగోలు కోసం ఓపెన్‌ ఆఫర్‌ ప్రకటించనుంది. దీంతో ఇప్పుడు 34 ఏళ్ల చరిత్ర కలిగిన ఎన్డీటీవీ అదానీ సొంతమైంది.
