ఓవైపు మిగ్జాం తుపాను సృష్టించిన బీభత్సాన్ని ఇంకా మరవకముందే.. మరోవైపు భూకంపం తమిళనాడు ప్రజలను భయకంపితులన్ని చేస్తోంది. ఇవాళ ఉదయం తమిళనాడులో భూప్రకంపనలు ప్రజలను భయాందోళనకు గురి చేశాయి. తమిళనాడులోని చెంగల్పట్టు జిల్లాలో ఉదయం 7:39 గంటలకు రిక్టర్ స్కేలుపై భూకంప తీవ్రత 3.2గా నమోదైందని అధికారులు తెలిపారు. 10 కిలోమీటర్ల లోతులో ఈ భూకంప కేంద్రాన్ని గుర్తించినట్లు వెల్లడించారు.
మరోవైపు తమిళనాడుతో పాటు గంటల వ్యవధిలోనే మరో మూడు రాష్ట్రాల్లో భూకంపాలు సంభవించాయి. గుజరాత్, మేఘాలయతో పాటు దక్షిణాది రాష్ట్రాలైన తమిళనాడు, కర్ణాటకల్లో నేషనల్ సెంటర్‌ ఫర్‌ సిస్మోలజీ భూప్రకంప కేంద్రాలను గుర్తించింది. గుజరాత్లోని కచ్ ప్రాంతంలో కూడా శుక్రవారం ఉదయం 9 గంటల ప్రాంతంలో రిక్టర్ స్కేల్పై 3.9 తీవ్రతతో భూమి కంపించగా.. మేఘాలయ రాజధాని షిల్లాంగ్లో కూడా ఉదయం 8:46 గంటల సమయంలో 3.8 తీవ్రతతో భూమి కదిలిందని అధికారులు తెలిపారు. కర్ణాటక విజయపుర జిల్లాలోని పలు ప్రాంతాల్లో కూడా శుక్రవారం ఉదయం 6.52 గంటలకు భూక్రంపనలు సంభవించాయి. ఇక్కడ రిక్టర్ స్కేల్పై 3.0 తీవ్రతతో భూకంపం వచ్చినట్లు కర్ణాటక రాష్ట్ర ప్రకృతి విపత్తు పర్యవేక్షణ కేంద్రం తెలిపింది.
