పహల్గామ్ ఉగ్రదాడి తర్వాత భారత్–పాకిస్తాన్ మధ్య ఉద్రిక్తతలు తీవ్రరూపం దాల్చిన నేపథ్యంలో, సైబర్ యుద్ధం ముప్పు మళ్లీ ముప్పేట మోస్తోంది. భారత రక్షణ వ్యవస్థకు సంబంధించిన కీలక వెబ్‌సైట్లు పాక్‌ ప్రేరేపిత హ్యాకర్ల దాడికి గురయ్యాయి. ముఖ్యంగా భారత రక్షణ మంత్రిత్వ శాఖ పరిధిలో ఉన్న వెబ్‌సైట్లు లక్ష్యంగా మారాయి. ‘పాకిస్తాన్ సైబర్ ఫోర్స్’ అనే గ్రూపు తమ ఎక్స్‌ ఖాతాలో పోస్టు చేస్తూ— మిలిటరీ ఇంజినీర్ సర్వీసెస్ (MES), మనోహర్ పారికర్ ఇనిస్టిట్యూట్ ఆఫ్ డిఫెన్స్ స్టడీస్ అండ్ అనాలిసిస్ (IDSA) వంటి కీలక సంస్థల నుంచి తమకు ముఖ్యమైన డేటా దక్కిందని ప్రకటించింది. ఇదే కాకుండా, ఆర్మర్డ్ వెహికిల్ నిగమ్ లిమిటెడ్ వెబ్‌సైట్‌పై కూడా సైబర్ దాడికి యత్నించినట్లు సమాచారం. దీంతో అధికారులు తక్షణ చర్యగా ఆ వెబ్‌సైట్‌ను ఆఫ్‌లైన్‌కు తరలించి, పూర్తి స్థాయిలో ఆడిట్ ప్రారంభించారు.
హ్యాకర్లకు రక్షణ సిబ్బంది లాగిన్ వివరాలు, సున్నితమైన సమాచారంతో పాటు, 1,600 మంది యూజర్లకు సంబంధించిన 10 జీబీ పైగా డేటా చేతికి చిక్కినట్లు అంచనా వేస్తున్నారు. ఇప్పటికే పాకిస్తాన్ ట్యాంక్‌ను భారత ట్యాంక్ స్థానంలో మార్ఫ్ చేసి ఆర్మర్డ్ వెహికిల్ వెబ్‌పేజీ స్క్రీన్‌షాట్‌ను హ్యాకర్లు షేర్ చేశారు. ఈ పరిస్థితులు ఉత్కంఠ కలిగించేలా ఉన్నాయని, భవిష్యత్‌లో మరిన్ని సైబర్ దాడులు జరిగే అవకాశముందని సైబర్ సెక్యూరిటీ నిపుణులు హెచ్చరిస్తున్నారు. తదుపరి ప్రమాదాలను నివారించేందుకు ప్రభుత్వ విభాగాలు ఇప్పటికే సాంకేతిక భద్రతా చర్యలను బలపరచడం ప్రారంభించాయి.
