ఇటీవల రైలు ప్రమాదాలు ఎక్కువగా జరుగుతున్నాయి. ఒడిశా రైలు ప్రమాదం మిగిల్చిన విషాదం మరవకముందే విజయనగరంలో రెండు రైళ్లు ఢీకొట్టిన ఘటన చోటుచేసుకుంది. ఇది జరిగిన రెండ్రోజులకే ఇప్పుడు మరో రైలు ప్రమాదం చోటుచేసుకుంది. ఉత్తర్ప్రదేశ్లోని ప్రయాగ్రాజ్ రైల్వే స్టేషన్ సమీపంలో సుహైల్‌దేవ్ సూపర్ఫాస్ట్ ఎక్స్ప్రెస్ రైలు పట్టాలు తప్పింది. ఈ ఘటనలో ఎవరికీ హాని జరగలేదు. మంగళవారం రాత్రి 9 గంటల ప్రాంతంలో ఘాజీపుర్ నుంచి దిల్లీలోని ఆనంద్ విహార్ టెర్మినల్కు వెళ్తున్న సుహైల్‌దేవ్ సూపర్ఫాస్ట్ ఎక్స్ప్రెస్ ఇంజిన్ సహా మరో రెండు కోచ్లు పట్టాలు తప్పాయి.
ఈ ఘటన గురించి విషయం తెలుసుకున్న రైల్వే సిబ్బంది వెంటనే అక్కడికి చేరుకున్నారు. ఈ ప్రమాదంలో ప్రాణనష్టం జరగకపోవడంతో ఊపిరి పీల్చుకున్నారు. ప్రమాదానికి గల కారణలపై ఆరా తీశారు. రైల్వే ట్రాక్ పునరుద్ధరణ పనులు చేపట్టడంతో.. మిగతా రైళ్ల రాకపోకలు సాధారణంగానే జరుగుతున్నాయని ఉత్తర మధ్య రైల్వే చీఫ్ పబ్లిక్ రిలేషన్స్ ఆఫీసర్ హిమాన్షు శేఖర్ ఉపాధ్యాయ్ తెలిపారు. గ్రీన్ సిగ్నల్ ఇచ్చిన వెంటనే రైలు ప్రయాగ్రాజ్ స్టేషన్ నుంచి బయలుదేరిందని.. ఆ సమయంలోనే ప్లాట్పామ్ నెంబర్ 6 వద్ద ఈ ఘటన జరిగిందని వెల్లడించారు.
