ఈ మధ్య తరచూ రైలు ప్రమాదాలు చోటుచేసుకుంటున్నాయి. సిగ్నల్ సమస్యలు, సిగ్నల్ జంపింగ్, ఒకే ట్రాక్పై రెండు రైళ్లు రావడం ఇలా రకరకాలుగా ప్రమాదాలు జరుగుతున్నాయి. పదుల సంఖ్యలో ప్రయాణికుల ప్రాణాలు తీస్తున్నాయి. తాజాగా పశ్చిమ బెంగాల్లో సోమవారం రోజున కాంచన్ జంఘా ఎక్స్ప్రెస్ను ఓ గూడ్స్ రైలు ఢీ కొన్న విషయం తెలిసిందే. ఈ ఘటనలో 15 మంది మరణించగా, 60మందికి పైగా గాయపడ్డారు.
అయితే ఈ ప్రమాదం సిగ్నల్ జంప్ కారణంగానే జరిగినట్లు రైల్వే బోర్డ్ అధికారులు తెలిపారు. రెడ్ సిగ్నల్ వేసినా గూడ్స్ రైలు పట్టించుకోకుండా వెళ్లడం వల్లే ఈ ఘటన జరిగిందని రైల్వే బోర్డ్ సీఈఓ జయ వర్మ సిన్హా వెల్లడించారు. ఈ ప్రమాదం సోమవారం ఉదయం 8:55 గంటలకు జరిగిందని.. కాంచన్జంఘా ఎక్స్ప్రెస్ను వెనుక నుంచి ఓ గూడ్స్ రైలు వచ్చి ఢీ కొట్టిందని చెప్పారు. రెడ్ సిగ్నల్ వేసినా గూడ్స్ ట్రైన్ లోకోఫైలట్ పట్టించుకోకుండా ముందుకు వెళ్లిన్నట్లు ప్రాథమిక విచారణలో తేలిందని పేర్కొన్నారు.
