గుజరాత్‌లో కేబుల్ బ్రిడ్జి కూలిన ఘటనకు సంబంధించి కీలక విషయాలు వెలుగులోకి వస్తున్నాయి. ఈ ఘటనకు మానవ తప్పిదాలే ప్రధాన కారణాలుగా కనిపిస్తున్నాయి. 100 మందిని మాత్రమే మోయగల సామర్థ్యం ఉన్న వంతెనపైకి 400 నుంచి 500 మందిని అనుమతించడం సహా కొందరి ఆకతాయి చేష్టలే ప్రమాదానికి కారణమైనట్లు తెలుస్తోంది. ఈ వ్యవహారంలో ఇప్పటికే 9 మందిని పోలీసులు అరెస్టు చేశారు.
ఈ విషాద ఘటనలో ఇప్పటి వరకు 130కిపైగా మరణించారని గుజరాత్ పోలీసులు తెలిపారు. మృతుల్లో అధికంగా చిన్నారులు, మహిళలే ఉన్నారని వెల్లడించారు. ఈ ప్రమాదానికి సంబంధించి సీసీటీవీ దృశ్యాలు తాజాగా వెలుగులోకి వచ్చాయి. అందులో కొంతమంది యువకులు వంతెనపై నిల్చొని బ్రిడ్జిని ఊపుతూ కనిపించారు. ఈ క్రమంలోనే ఒక్కసారిగా వంతెన కుప్పకూలి అందరూ నదిలో పడిపోయారు.
ఇప్పటికే ఈ కేసుకు సంబంధించి కేబుల్ బ్రిడ్జి నిర్వహణ సంస్థకు చెందిన కొంతమందిని పోలీసులు ఇవాళ ఉదయం నుంచి సాయంత్రం వరకు ప్రశ్నించారు. ఈ క్రమంలోనే మొత్తం తొమ్మిది మందిని అరెస్టు చేసినట్లు ప్రకటించారు.
