నిజామాబాద్ నగరంలో దారుణం చోటుచేసుకుంది. బుధవారం రాత్రి స్నూకర్ పార్లర్ వద్ద జరిగిన గొడవలో ఓ యువకుడిపై రాడ్లతో దాడి జరిగింది.ఈ ఘటనలో యువకుడి తలకు తీవ్రగాయాలయ్యాయి. గాయపడిన యువకుడిని ప్రభుత్వ ఆస్పత్రికి తరలించగా డాక్టర్లు తలకు 10 కుట్లు వేసి శస్రచికిత్స చేశారు.
నిన్న రాత్రి నగరంలోని బోధన్ రోడ్డులో ఓ ప్రైవేట్ హాస్పిటల్ వద్ద గల రషీద్‌ అనే వ్యక్తికి చెందిన స్నూకర్ పార్లర్ వద్ద బర్కత్ పురకు చెందిన బాసిన్ ఖాన్ అనే యువకుడిపై దాడి జరిగింది. ఆన్‌లైన్ బెట్టింగ్ దందా నిర్వాహకులు బాసిద్ ఖాన్‌పై రాడ్లతో దాడి చేశారు. దీనికి ముందు ఆన్‌లైన్లో బెట్టింగ్ కాసే గున్నా గ్యాంగ్, బాసిన్ ఖాన్‌లు గొడవ పడినట్లు తెలుస్తోంది. దీంతో బాసిన్ ఖాన్ స్నూకర్ పార్లర్ నుండి బయటకు రాగానే రోడ్డుపైనే రాడ్లతో దాడికి పాల్పడ్డారు. ఈ ఘటనలో బాసిన్ ఖాన్ తలకు తీవ్రగాయమైంది. బాధితుడి ఫిర్యాదు మేరకు వన్ టౌన్ పోలీసులు కేసు నమోదు చేసి దర్యాప్తు చేస్తున్నట్లు తెలిపారు.
