మెగాస్టార్ చిరంజీవి రేపు 68వ ఏట అడుగుపెట్టబోతున్నారు. అన్నయ్య బర్త్‌డే కోసం అభిమానులు ఎంతో ఆసక్తిగా ఎదురుచూస్తున్నారు. ఈరోజు అర్ధరాత్రి దాటిన వెంటనే చిరంజీవికి పుట్టినరోజు శుభాకాంక్షలు తెలియజేయాలని అభిమానులు ఎంతో ఉత్సాహంగా ఉన్నారు. అయితే, అందరి కంటే ముందుగా అన్నయ్యకు ఎంతో ఇష్టమైన తమ్ముడు కళ్యాణ్ బాబు పుట్టినరోజు శుభాకాంక్షలు తెలియజేశారు. రేపు మెగాస్టార్ చిరంజీవి పుట్టిన రోజు నేపథ్యంలో ‘అన్నయ్యకు జన్మదిన శుభాకాంక్షలు’ అంటూ సామాజిక అనుసంధాన వేదిక ట్విట్టర్ (ఎక్స్)లో ట్వీట్ చేశారు.
‘అన్నయ్య చిరంజీవికి ప్రేమపూర్వక శుభాకాంక్షలు. మీ తమ్ముడిగా పుట్టి మిమ్మల్ని అన్నయ్య అని పిలిచే అదృష్టాన్ని కలిగించినందుకు ఆ భగవంతుడికి ముందుగా కృతజ్ఞతలు చెబుతున్నాను. ఒక సన్నని వాగు అలా ప్రవహిస్తూ మహానదిగా మారినట్లుగా మీ ప్రయాణం నాకు గోచరిస్తోంది. మీరు ఎదిగి మేము ఎదగడానికి ఒక మార్గం చూపడమే కాకుండా లక్షలాదిమందికి స్పూర్తిగా నిలిచిన మీ సంకల్పం, పట్టుదల, శ్రమ, నీతినిజాయతీ, సేవాభావం నా వంటి ఎందరికో ఆదర్శం. కోట్లాదిమంది అభిమానాన్ని మూటగట్టుకున్నా… కించిత్ గర్వం మీలో కనిపించకపోవడానికి మిమ్మల్ని మీరు మలుచుకున్న తీరే కారణం. చెదరని వర్చస్సు, వన్నె తగ్గని మీ అభినయ కౌశలంతో సినీ రంగాన అప్రతిహతంగా మీరు సాధిస్తోన్న విజయాలు అజరామరమైనవి. ఆనందకరం, ఆరోగ్యకరమైన సంపూర్ణ ఆయుష్షుతో, మీరు మరిన్ని విజయాలు చూడాలని మనస్పూర్తిగా కోరుకుంటున్నాను. హ్యాపీ బర్త్ డే అన్నయ్య’ అంటూ ట్వీట్ చేశారు.
