పెద్దపల్లి జిల్లా కొత్తపల్లిలో ఘోర ప్రమాదం జరిగింది. రైలు ఢీకొని ముగ్గురు కార్మికులు అక్కడికక్కడే దుర్మరణం చెందారు. ఈ ఘటనలో ఒకరు స్వల్ప గాయాలతో బయటపడ్డారు. మంగళవారం మధ్యాహ్నం జరిగిన ఈ ఘటన ఆలస్యంగా వెలుగులోకి వచ్చింది. కొత్తపల్లి గ్రామ శివారులో దుర్గయ్య, శ్రీనివాస్, వేణు, శీను అనే నలుగురు కూలీలు రైల్వే పట్టాలకు గ్రీసు రాస్తున్నారు. తమ పనిలో నిమగ్నమైన ఈ కార్మికులు ఎదురుగా వస్తోన్న రైలును గమనించలేదు. అతివేగంగా వచ్చిన రాజధాని ఎక్స్‌ప్రెస్‌ ఢీ కొట్టింది. ఈ ప్రమాదంలో శ్రీనివాస్ అనే కూలీ మాత్రమే స్వల్ప గాయాలతో బయటపడ్డారు.
హుస్సేన్‌మియా వాగువద్ద ట్రాక్ మరమ్మతుల చేస్తుండగా ఈ ప్రమాదం చోటుచేసుకుంది. మృతదేహాలు గుర్తుపట్టనంత దారుణంగా మారిపోయాయి. కేసు నమోదు చేసుకున్న పోలీసులు దర్యాప్తు చేపట్టారు. మృత దేహాలను ప్రభుత్వ ఆసుపత్రికి తరలించారు. కార్మికుల మృతితో వారి కుటుంబాల్లో తీరని విషాదం చోటుచేసుకుంది.
