ఐకాన్ స్టార్ అల్లు అర్జున్ హీరోగా సుకుమార్‌ తెరకెక్కించిన చిత్రం ‘పుష్ప: ది రైజ్‌’. అంచనాల మధ్య రిలీజ్ అయిన ఈ సినిమా ఎవరూ ఊహించనంత విజయం సాధించిన సంగతి తెలిసిందే. ఈ సినిమా విడుదలై నాలుగు నెలలు గడుస్తున్నా.. ఓటీటీలోనూ విడుదలై చాలా రోజులైనా ఇప్పటికీ దీని హవా సాగుతోంది.
ఇటీవల ఈ సినిమాను మాస్కో ఇంటర్నేషనల్‌ ఫిల్మ్‌ ఫెస్టివల్‌లో ప్రదర్శించారు. ప్రపంచవ్యాప్తంగా బ్లాక్‌బాస్టర్‌గా నిలిచిన చిత్రాల కేటగిరిలో పుష్ప తెలుగు వర్షన్‌ సినిమాను ఇంగ్లిషు, రష్యన్‌ సబ్‌ టైటిల్స్‌తో ప్రదర్శించడం విశేషం. అతి త్వరలో ఈ సినిమా రష్యన్‌ డబ్బింగ్‌ వర్షన్‌ను కూడా విడుదల చేయనున్నారు. గతేడాది డిసెంబర్‌ 17న విడుదలైన ఈ సినిమాను మలయాళం, హిందీ, తమిళం, కన్నడ భాషల్లో డబ్‌ చేశారు. అల్లుఅర్జున్‌ పాపులర్‌ డాన్స్‌ నంబర్‌ అయిన ‘శ్రీవల్లి’ పాటతో పాటు సమంతా నటించిన ‘‘ఊ అంటావా ఊఊ అంటావా’’ పాటలు సోషల్‌మీడియాను హోరెత్తించాయి.
