టైటిల్ చూసి ఇదేం తలనొప్పి బాబోయ్ అని గాబర పడకండి.. కానీ కొంచెం ఆలోచించండి.. ఎందుకంటే ఈ మధ్యకాలంలో ఓ అందమైన ఫొటో ఆండ్రాయిడ్ మొబైల్ ఫోన్ యూజర్లను కలవరపెడుతోందట. పొరబాటున ఆ ఫొటోను ఓపెన్ చేసినా, వాల్‌పేపర్‌గా పెట్టుకున్నా ఫోన్లు క్రాష్ అవుతున్నాయట. ఒకవేళ ఆ ఫొటో గనుక మీ ఫోన్లో ఉంటే వెంటనే డిలీట్ చేయాలని, వాల్‌పేపర్‌గా పెట్టుకుంటే మొబైల్ క్రాష్ అవుతోందని తెలుపుతున్నారు. చాలామంది అది నిజమేనంటూ తమ అనుభవాలను సోషల్ మీడియాలో వెల్లడిస్తున్నారు. అయితే ప్రస్తుతం ఈ వార్త సోషల్ మీడియాలో వైరల్‌గా మారి చక్కర్లు కొడుతోంది..
ఇక అసలు విషయానికి వస్తే 2009 వ సంవత్సరంలో ఆగస్టున అమెరికాలోని గ్లాసియర్ నేషనల్ పార్క్‌లోని సెయింట్ మేరీ లేక్ వద్ద ఫొటోగ్రాఫర్ గౌరవ్ అగ్రవాల్ ఓ ఫోటో తీశాడట. ఆ తర్వాత దాన్ని ఫ్లిక్కర్‌లో పోస్టు చేయగా ఎవరైతే ఆండ్రాయిడ్ ఫోన్లు కలిగిన వారు, ముఖ్యంగా సామ్‌సంగ్, గూగుల్ పిక్సెల్ ఫోన్లు కలిగిన వారు ఈ ఫొటోను ఫోన్లలో వాల్‌పేపర్లుగా పెట్టుకుంటే, ఆ ఫోన్లు క్రాష్ కావడం, ఫ్యాక్టరీ రీసెట్ అవడం జరుగుతున్నాయట.. కాబట్టి మీ ఫోన్లో ఇలాంటి ఫోటో గనుక ఉంటే వెంటనే డిలీట్ చేయండని ఇతను పేర్కొంటున్నాడు..
అయితే ఈ ఫోటో వల్ల ఫోన్లకు ఇలా జరగడానికి సరైన కారణం ఏమిటనేది ఇప్పటికీ తెలియరాలేదు సరికదా నిపుణులు కూడా ఖచ్చితంగా చెప్పలేకపోతున్నారట, కానీ సామ్‌సంగ్ సంస్థ మాత్రం ఈ విషయాన్ని సీరియస్‌గా తీసుకుని, ఫోన్లలో ఆ సమస్య రాకుండా ఉండేందుకు ఈరోజున కొత్త అప్‌డేట్ విడుదల చేసింది.. ఇక మిగతా ఫోన్ల సంగతి అయితే తెలియదు గానీ మీరు కూడా ఒక సారి చెక్ చేసుకోండి అలాంటి ఫోటో మీ మొబైల్లో ఉందేమో..
