‘ఆర్ఆర్ఆర్’ ఎఫెక్ట్.. కుల పిచ్చి ఉన్న వారి కుత్తుక కోయాలి..పీవీపీ సెన్సేషనల్ కామెంట్స్

దేశవ్యాప్తంగా సామాన్యులు, అభిమానుల నుంచి సెలబ్రిటీల వరకు అందరి వద్ద నుంచి ‘ఆర్ఆర్ఆర్’ చిత్రంపై సానుకూల స్పందన వస్తున్నది. మాస్టర్ స్టోరి టెల్లర్ రాజమౌళి తెరకెక్కించిన విజ్యువల్ వండర్ ‘ఆర్ఆర్ఆర్’ను కంపల్సరీగా వెండితెరపైన ప్రతీ ఒక్కరు చూడాలని పేర్కొంటున్నారు. పలువురు ప్రముఖులు కూడా ఈ సినిమా గురించి సోషల్ మీడియా వేదికగా ప్రమోట్ చేస్తున్నారు. అయితే, కొన్ని వెబ్ సైట్లు, మీడియా సంస్థలు, వ్యక్తులు ‘ఆర్ఆర్ఆర్’ ఫిల్మ్ పై నెగెటివ్ రివ్యూలు ఇచ్చాయి. వాటిపై ప్రముఖ సినీ నిర్మాత, వైసీపీ నేత పొట్లూరి వర ప్రసాద్ (పీవీపీ)సంచలన కామెంట్స్ చేశారు. ఈ మేరకు ట్విట్టర్ వేదికగా ట్వీట్స్ ద్వారా తన ఆవేశాన్ని బయట పెట్టారు.

జీవితంలో సినిమాకు సంబంధించి ఒక్క షాట్ తియ్యలేని, ఒక్క రోజు షూటింగ్‌లో నిలబడలేని వారు సినిమాలు తీయడం గురించి అందరికీ క్లాసులు పీకుతారని పీవీపీ ఆగ్రహం వ్యక్తం చేశారు. సినీ ప్రపంచంలో భయపడుతూ బతికే వాళ్లందరూ తమ కష్టాన్ని అపహాస్యం చేసేవాళ్లపైన తిరగబడాలని పీవీపీ సూచించారు. ఈ క్రమంలోనే కళకు కులం పిచ్చి అంటగట్టే వారి కుత్తుక కోయాలని తీవ్రస్థాయిలో స్పందించారు. జాతి గర్వించే కథలు, దేశభక్తితో నెత్తురు ఉడికించే సినిమాను చూసి శభాష్ అనాలని అన్నారు. మన తెలుగోడు జాతీయ సంపద అయినందుకు మనవాడని ఆనందపడాలని సూచించారు.

ఈ క్రమంలోనే తనకు సినిమా హీరోలతో కాని, దర్శక నిర్మాతలతో కాని ఇప్పుడు, మున్ముందు వ్యాపారం లేదని, కాస్త తెలుగోడిలా, గర్వపడండిరా కొడకల్లారా అంటూ తీవ్రస్థాయిలో పీవీపీ ఆగ్రహం వ్యక్తం చేశారు.
ఇక ఈ ట్వీట్ చూసి నెటిజన్లు భిన్న రకాలుగా స్పందిస్తు్న్నారు. ‘ఆర్ఆర్ఆర్’ సినిమాపైన నెగెటివ్ రివ్యూలు ఇచ్చిన మీడియా సంస్థలపై పీవీపీ ఆగ్రహం వ్యక్తం చేయడాన్ని మెగా, నందమూరి అభిమానులు సమర్థిస్తున్నారు.