చరణ్ పుట్టినరోజుకు ఇంకా నాలుగు వారాల సమయం ఉన్నా, అభిమానులు ఇప్పటినుంచే సంబరాలు ప్రారంభించారు. ఆర్ఆర్ఆర్ చిత్రంతో అంతర్జాతీయ స్థాయిలో గుర్తింపు తెచ్చుకున్న టాలీవుడ్ గ్లోబల్ స్టార్ రామ్ చరణ్ మార్చి 27న పుట్టినరోజు జరుపుకుంటున్నారు. హాలీవుడ్ లో రామ్ చరణ్ కు లభిస్తున్న ఆదరణ అభిమానులను ఆనందోత్సాహాల్లో ముంచెత్తుతోంది. ఇలాంటి తరుణంలో తమ ఆరాధ్య హీరో పుట్టినరోజు రావడంతో వారి సంతోషానికి అవధుల్లేకుండా పోతోంది.
రామ్ చరణ్ చిత్రంతో సరికొత్త సీడీపీ (కామన్ డిస్ ప్లే పిక్చర్)ని సోషల్ మీడియాలో విడుదల చేశారు. మాస్ మార్చ్ పేరుతో మార్చి నెల అంతా తమ అభిమాన హీరో పుట్టినరోజు వేడుకలు జరిపేందుకు ఈ సీడీపీతో శ్రీకారం చుట్టారు. మార్చి నెలలో చివరి మూడు అక్షరాలు ‘ఆర్ సీహెచ్’ లను రామ్ చరణ్ అనే అర్థం వచ్చేలా పెద్దగా రాశారు. సీడీపీ చూస్తే ఈ విషయం స్పష్టంగా తెలుస్తుంది. ఆర్ఆర్ఆర్ తో రామ్ చరణ్ కు ప్రపంచవ్యాప్త ఆదరణ పొందడం జరిగింది. ఈ మేరకు చరణ్ పుట్టినరోజును మరింత చిరస్మరణీయం చేసేలా అభిమానుల కార్యాచరణ చేపట్టారు.
