దేశంలో సంక్షోభాలు తలెత్తినప్పుడు.. అవసరంలో ఉన్న వారిని ఆదుకునేందుకు పీఎం కేర్స్ ఫండ్ ఏర్పాటు చేశారు. దీనికి విరాళాలు అందించిన ప్రతి ఒక్కరికి ప్రధాని మోదీ కృతజ్ఞతలు తెలిపారు.పీఎం కేర్స్ ఫండ్ ట్రస్టీల బోర్డు సమావేశానికి హాజరైన మోదీ.. బోర్డులో కొత్తగా ట్రస్టీలుగా చేరిన ప్రముఖులకు స్వాగతం పలికారు.
పీఎం కేర్స్ ఫండ్ ట్రస్టీలుగా ఇటీవల నామినేట్ అయిన టాటా గ్రూప్ మాజీ ఛైర్మన్ రతన్ టాటా, సుప్రీంకోర్టు మాజీ న్యాయమూర్తి జస్టిస్ కేటీ థామస్, లోక్సభ మాజీ డిప్యూటీ స్పీకర్ కరియా ముండా.. తొలిసారి ఈ సమావేశానికి హాజరయ్యారు. కేంద్ర హోంమంత్రి అమిత్ షా, ఆర్థిక మంత్రి నిర్మలా సీతారామన్ కూడా ఈ భేటీలో ట్రస్టీల హోదాలో పాల్గొన్నారు. ‘పీఎం కేర్స్ ఫర్ చిల్డ్రన్’ పేరిట 4,345 మంది చిన్నారులకు అండగా నిలవడం సహా.. పీఎం కేర్స్ ఫండ్ ద్వారా ఇప్పటివరకు చేపట్టిన కార్యక్రమాలపై ట్రస్టీలంతా చర్చించినట్లు ప్రధాన మంత్రి కార్యాలయం ఓ ప్రకటనలో తెలిపింది.
