ఎన్ని హెచ్చరికాలు చేసినా వృథా అయ్యాయి. అమెరికా, నాటో వార్నింగ్ లను పుతిన్ కాస్త కూడా కేర్ చేయలేదు. ఈ ఏడాది ఫిబ్రవరిలో ఉక్రెయిన్ పై భీకర యుద్ధాన్ని ప్రకటించిన పుతిన్.. అప్పటి నుంచి ఆ దేశ భూభాగాలను వశం చేసుకునేందుకు ప్రయత్నిస్తూనే ఉన్నారు. ఎట్టకేలకు ఉక్రెయిన్ లోని నాలుగు భూభాగాలను పుతిన్ రష్యాలో విలీనం చేశారు.
ఉక్రెయిన్పై సైనికచర్య సందర్భంగా స్వాధీనం చేసుకున్న దొనెత్స్క్ , లుహాన్స్క్ , జపోరిజియా, ఖేర్సన్ ప్రాంతాలు రష్యాలో విలీనమయ్యాయి. క్రెమ్లిన్ లో జరిగిన కార్యక్రమంలో రష్యా అధ్యక్షుడు పుతిన్ ఈ మేరకు ప్రకటన చేశారు. ఉక్రెయిన్‌కు చెందిన 15శాతం భూభాగం రష్యాలో విలీనమైందని తెలిపారు. విలీన ఒప్పందంపై దొనెత్స్క్ , లుహాన్స్క్, జపోరిజియా, ఖేర్సన్ ప్రాంతాలకు చెందిన అధినేతలు సంతకాలు చేశారు. అయితే, పుతిన్ చేసిన ప్రకటనను ఉక్రెయిన్ అధ్యక్షుడు జెలెన్‌స్కీ తోసిపుచ్చారు. ప్రకటన పనికిరానిదని.. వాస్తవాలను ఎవరూ మార్చలేరని అన్నారు.
రష్యా విలీనం చేసుకున్న ఆ నాలుగు భూభాగాల్లో నాటో దళాలు ఇక అక్కడ అడుగు పెట్టలేవు. ఒకవేళ అందుకు విరుద్ధంగా జరిగితే మాత్రం.. పరిస్థితి ఒక్కసారిగా తీవ్ర ఉద్రిక్తంగా మారిపోతుంది. అది అణు యుద్ధానికి దారితీసే ప్రమాదం ఉంది.
