పరువు నష్టం కేసులో కాంగ్రెస్ అగ్రనేత రాహుల్ గాంధీకి గుజరాత్‌లోని సూరత్ కోర్టులో చుక్కెదురైంది. తనకు పడిన శిక్షపై స్టే విధించాలని చేసిన అభ్యర్థనను కోర్టు కొట్టివేసింది. దీంతో రాహుల్ గాంధీపై శిక్ష కొనసాగనుంది. రాహుల్ దాఖలు చేసిన పిటిషన్పై సూరత్ సెషన్స్ కోర్టు.. ఏప్రిల్ 13న ఇరువర్గాల వాదనలు విన్నది.
ఆ సమయంలో రాహుల్ తరఫున వాదనలు వినిపించిన సీనియర్ అడ్వొకేట్ ఆర్ఎస్ చీమా.. మోదీ అనేది కులం పేరు కాదని అన్నారు. రాహుల్కు శిక్ష విధించిన న్యాయమూర్తిని ఎవరో తప్పుదోవ పట్టించారని తెలిపారు. న్యాయమూర్తి కఠిన పదాలు ఉపయోగించడం సరికాదని వాదించారు.
“రాహుల్కు విధించిన శిక్షలో ఒక్కరోజు తగ్గినా.. అనర్హత వేటు పడదని కోర్టుకు తెలుసు. ఆయన్ను దోషిగా తేల్చి అరగంట వ్యవధిలో అత్యంత కఠినమైన శిక్ష విధించారు. సుప్రీంకోర్టు రాహుల్ను హెచ్చరించిందని కోర్టు తన ఆదేశాల్లో పేర్కొంది. సుప్రీం హెచ్చరికలను సైతం పట్టించుకోలేదని కఠిన వ్యాఖ్యలు చేసింది. కానీ, ఆయన ప్రసంగం.. సుప్రీం హెచ్చరికల కన్నా ముందే జరిగింది” అని రాహుల్ తరఫు న్యాయవాది తెలిపారు.
