తెలంగాణ అసెంబ్లీ ఎన్నికల ప్రచారం తుది దశకు చేరుకున్న వేళ బీఆర్ఎస్ అధినేత, సీఎం కేసీఆర్ ప్రచారాన్ని ఉద్ధృతం చేశారు. ఇవాళ మరో నాలుగు ప్రజా ఆశీర్వాద సభల్లో కేసీఆర్ పాల్గొననున్నారు. మంచిర్యాల, రామగుండం, ములుగు భూపాలపల్లిలో బీఆర్ఎస్ అభ్యర్థులకు మద్దతుగా ఆయన ప్రచారం చేయనున్నారు. రోజుకు నాలుగు నియోజకవర్గాల్లో జరుగుతున్న ప్రజా ఆశీర్వాద సభల్లో పాల్గొని పార్టీ అభ్యర్థులకు మద్దతుగా కేసీఆర్ ప్రచారం చేస్తున్న విషయం తెలిసిందే. ఈ సభా వేదికల్లో కేసీఆర్.. ప్రజలకు ఓటు హక్కును వివరిస్తున్నారు. మరోవైపు తొమ్మిదన్నరేళ్ల అభివృద్ధిని గురి చేస్తూ.. కాంగ్రెస్పై తీవ్ర విమర్శలు గుప్పిస్తున్నారు.
మరోవైపు ఈ నెల 25న జరిగే సీఎం కేసీఆర్ సభ ఏర్పాట్లను వేగవంతం చేయాలని మంత్రి తలసాని శ్రీనివాస్ యాదవ్ ఆదేశించారు. ఆయన టీఎస్ఐఐసీఛైర్మన్ గ్యాదరి బాలమల్లు తో కలిసి సభా వేదిక నిర్మాణం, భారికేడ్ ల ఏర్పాట్లను పరిశీలించారు. ఎన్నికల ప్రచారం ప్రారంభించినప్పటి నుంచి ఇప్పటి వరకు 82 సభల్లో సీఎం పాల్గొన్నారు. బీఆర్ఎస్ ప్రభుత్వ కార్యక్రమాలు వివరిస్తూనే ఎన్నికల్లో గెలిస్తే అమలు చేసే వాటిని ప్రజలకు కేసీఆర్ వివరిస్తున్నారు. ఇదే సందర్భంలో విపక్షాలు…. ప్రత్యేకించి కాంగ్రెస్ పార్టీ వైఖరి, నేతల వ్యాఖ్యలను ఎండగడుతున్నారు.
