మనం ఏ పని మొదలుపెట్టాలన్నా మనం ముందుగా పూజించేది ఆ గణనాథుడిని. సాధారణంగా వినాయకుడు ఏకదంతుడిగా, ఎలుక వాహనంపై దర్శనమిస్తాడు. కానీ, ప్రపంచంలోనే అత్యంత అరుదుగా మూడు తొండాలు, మూడు ముఖాలు ఆరు చేతులతో నెమలిపై కొలువైన శ్రీ గణపతి ఆలయం ఒకటి ఉందంటే నమ్ముతారా? అవును మహారాష్ట్రలోని పూణేలో ఉన్న త్రిశుండ మయూరేశ్వర్ గణపతి ఆలయంలో ఈ వింతైన విగ్రహాన్ని చూడవచ్చు. ఆ క్షేత్ర విశేషాలేంటో ఇప్పుడు తెలుసుకుందాం..
16 ఏళ్ల నిర్మాణ అద్భుతం: పూణేలోని సోమవార్ పేటలో, నాగజరి నదీ తీరంలో ఈ అరుదైన ఆలయం ఉంది. భీమజీగిరి గోసవి అనే మహనీయుడు 1754లో ఈ ఆలయ నిర్మాణాన్ని ప్రారంభించగా, దాదాపు 16 సంవత్సరాల శ్రమ తర్వాత 1770లో విగ్రహాన్ని ప్రతిష్టించారు. ఇక గర్భగుడి గోడలపై సంస్కృతం, పెర్షియన్ భాషల్లో రాసిన శాసనాలు ఇక్కడ దర్శనమిస్తాయి.
శిల్పకళా వైవిధ్యం.. వింత విగ్రహాలు: ఈ ఆలయంలో రాజస్థానీ, మాల్వా శిల్పకళా రీతులు ఉట్టిపడతాయి. ప్రవేశ ద్వారం వద్ద ద్వారపాలకులు, ఏనుగులు, గుర్రాల విగ్రహాలు ఎంతో అందంగా ఉంటాయి. ఇక్కడొక వింతైన శిల్పం ఉంది.. ఒక అమెరికన్ సైనికుడు ఖడ్గమృగాన్ని ఇనుప చైనులతో కడుతున్నట్లు ఉండే ఆ విగ్రహం మన దేశంలో మరెక్కడా కనిపిచదు.
గురుపూర్ణిమ ప్రత్యేకత: ఆలయ నిర్మత అయిన గోసవి గారి సమాధి కూడా ఆలయ ప్రాంగణంలోనే ఉంది. గుడి కింద నీటితో ఉండే ఒక కొలనులాంటి నిర్మాణం ఉంటుంది. ఇక ఏడాదంతా నీటితో ఉండే ఈ ప్రదేశాన్ని గురుపూర్ణిమ రోజున మాత్రం శుభ్రం చేసి పొడిగా ఉంచుతారు. ఆ రోజు గోసవి గారికి భక్తులు విశేష పూజలు నిర్వహిస్తారు.
ఉత్సవాల కోలాహలం: ఈ ఆలయంలో ప్రతి నెల వచ్చే సంకటహర చతుర్థిని చాలా ఘనంగా జరుపుతారు. ఇక వినాయక చవితి ఉత్సవాలైతే తొమ్మిది రోజుల పాటు అత్యంత వైభవంగా జరుగుతాయి. ఇక పూణే చుట్టుపక్కల ప్రాంతాల నుంచి వేల సంఖ్యలో భక్తులు వచ్చి స్వామివారిని దర్శించుకుంటారు.
ఇక మూడు తొండాలతో నెమలిపై దర్శనమిచ్చే ఈ త్రిశుండ గణపతిని దర్శించుకుంటే కష్టాలన్నీ తొలగిపోతాయని భక్తుల విశ్వాసం. పూణే వెళ్లినప్పుడు ఈ అరుదైన, పవిత్రమైన ఆలయాన్ని తప్పక దర్శించండి.
