సమాజంలో రోజురోజుకు కామాంధులు రెచ్చిపోతున్నారు. అంతేకాకుండా తమ పుత్రుడు పుణ్యం కార్యం చేసిన విధంగా వారి తల్లిదండ్రులు వ్యవహరించే తీరు మరింత బాధకరం.. అలాంటి ఘటనే ఇది. ఓ యువతిపై అదే గ్రామానికి చెందిన యువకుడు అత్యాచారం చేశాడు. దీంతో పంచాయితీ పెట్టడంతో గ్రామ పెద్దలు వివాహం చేసుకోవాలని తీర్పు ఇచ్చారు. దీంతో తీర్పుకు ఒప్పుకొని తాళి కట్టిన ఆ ప్రబుద్ధుడు.. ఆ తరువాత కట్నం కావాలంటూ.. బలవంతం చేశాడు. అంతేకాకుండా ఆ యువకుడి కుటుంబీకులు సైతం బాధిత యువతి కుటుంబ సభ్యులపై దాడికి దిగారు. ఈ ఘటన ఉత్తరాఖండ్‌లో చోటు చేసుకుంది. వివరాల్లోకి వెళితే.. మంగ్లౌర్ కొత్వాలీ ప్రాంతానికి చెందిన యువతి తల్లిదండ్రులు ఏప్రిల్ 13న వైద్యం కోసం రిషికేశ్ ఎయిమ్స్కు వెళ్లారు. అర్ధరాత్రయినా తిరిగి రాలేదు.
దీంతో తన సోదరుడు, సోదరితో కలిసి వరండాలో నిద్రపోయింది బాధితురాలు. అదే గ్రామానికి చెందిన ఓ యువకుడు ఇంట్లోకి ప్రవేశించి యువతితో అసభ్యంగా ప్రవర్తించాడు. గన్తో బెదిరించి అత్యాచారానికి పాల్పడ్డాడు. తల్లిదండ్రులు ఇంటికి వచ్చాక తనపై జరిగిన అఘాయిత్యం గురించి వారికి చెప్పింది బాధితురాలు. ఆ వెంటనే నిందితుడి ఇంటికి వెళ్లి ఆందోళన చేశారు ఆమె కుటుంబ సభ్యులు. మొజ్జిజ్ కమ్యూనిటీకి చెందిన పెద్దలు పంచాయతీ నిర్వహించి.. ఇరువురికి పెళ్లి చేయాలని నిర్ణయించారు. మే 16న వారి వివాహం జరిపించారు. మే 17న పెళ్లిని రిజిస్టర్ చేసేందుకు సిద్ధమయ్యారు. ఈ క్రమంలోనే యువకుడి కుటుంబ సభ్యులు రూ.5 లక్షలు, ద్విచక్రవాహనం ఇవ్వాలని డిమాండ్ చేశారు. ఈ విషయంపై బాధితురాలి బంధువులు మాట్లాడేందుకు ప్రయత్నించగా.. నిందితుడి కుటుంబ సభ్యులు వారిపై దాడి చేశారు. ఈ దాడిలో యువతి బంధువులకు గాయాలయ్యాయి.బాధితురాలి ఫిర్యాదు మేరకు నిందితుడి కుటుంబ సభ్యుల్లోని 8 మంది దానీశ్, రాఫా, ఇద్రీస్, పప్పూ, ఫరూక్, నాజీమ్, ప్రమోద్, అశోక్పై కేసు నమోదు చేశారు పోలీసులు. ఈ కేసును మహిళా ఎస్సై అన్షు చౌదరికి అప్పగించామని మంగ్లౌర్ కొత్వాలీ ఎస్ఎస్ఐ రఫత్ అలీ తెలిపారు.
