తమకు నాణ్యమైన ఆహారం అందించడం లేదని, హాస్టళ్లలో క్వాలిటీ లేని భోజనం పెడుతున్నారని ఉస్మానియా యూనివర్సిటీ విద్యార్థులు శుక్రవారం ఉదయం ఒక్కసారిగా రోడ్డెక్కారు. ఓయూలోని న్యూగోదావరి హాస్టల్ విద్యార్థులు ఆర్ట్స్ కళాశాల ఎదుట ఆందోళన చేపట్టారు. యూనివర్సిటీ హాస్టళ్లలో నాణ్యత లేని ఆహారం పెడుతున్నారని నినాదాలు చేస్తూ సాంబార్ గంజుతో సహా రోడ్డుపై భైఠాయించారు.
వీసీ, వార్డెన్స్ దీనిపై స్పందించాలని డిమాండ్ చేస్తూ ఆందోళన చేపట్టారు. విద్యార్థులకు అందించే ఆహారం పూర్తిగా నాణ్యత లేకుండా ఉంటుందని, ఇలాంటి ఆహారం తిని అనారోగ్యానికి గురి కావాల్సి వస్తుందని ఆవేదన వ్యక్తం చేస్తున్నారు. దీనిపై ఉస్మానియా ఉన్నతాధికారులు వెంటనే స్పందించి చర్యలు తీసుకోవాలన్నారు. తమకు న్యాయం చేయాలని, నాణ్యతలేని ఆహారం వడ్డించడంపై ప్రభుత్వం వెంటనే స్పందించాలని కోరారు.
