మనకు వచ్చే సాధారణ తలనొప్పి కాదు అది మగతగాను, వెలుగును చూడలేకపోయేంత బాధగాను ఉంటుంది అదే మైగ్రేన్. ఎంత దారుణంగా ఉంటుందో అనుభవించిన వారికే తెలుస్తుంది. అయితే తరచూ వచ్చే తలనొప్పులకు మరియు మనం రోజూ తినే ఆహారానికి మధ్య ఏదైనా రహస్య లింక్ ఉందా? అవుననే అంటున్నారు నిపుణులు! కొందరికి కొన్ని ప్రత్యేకమైన ఆహార పదార్థాలు మైగ్రేన్‌ను ప్రేరేపించే ‘ట్రిగ్గర్‌ల’ లాగా పనిచేస్తాయి. మీ ఆహారపు అలవాట్లలో చిన్న చిన్న మార్పులు చేసుకోవడం ద్వారా ఈ భయంకరమైన తలనొప్పిని గణనీయంగా తగ్గించుకునే అవకాశం ఉంది. మరి వాటి గురించి తెలుసుకుందాం..
మైగ్రేన్‌ను తగ్గించాలంటే ముందుగా మీకు నొప్పిని కలిగించే ఆహార పదార్థాలను (ట్రిగ్గర్‌లను) గుర్తించడం ముఖ్యం. దీని కోసం మీరు ఒక ‘హెడ్ఏక్ డైరీ’ని నిర్వహించడం చాలా ఉపయోగపడుతుంది. మీరు ఎప్పుడు తలనొప్పికి గురయ్యారు దానికి ముందు ఏం తిన్నారో రాసుకోవాలి. సాధారణంగా మైగ్రేన్‌ను ప్రేరేపించే కొన్ని ఆహారాలు తెలుసుకుందాం..
ప్రాసెస్డ్ మరియు పాత ఆహారాలు: ఇందులో టైరమైన్ అనే పదార్థం ఉంటుంది. పాత జున్ను (Aged Cheese), పొగబెట్టిన చేపలు (Smoked Fish) వంటి వాటిని తగ్గించాలి.
నైట్రేట్లు ఉన్నవి: ప్రాసెస్డ్ మాంసాలలో (హామ్, సాసేజ్‌లు) నైట్రేట్లు ఉంటాయి, ఇవి కొందరిలో మైగ్రేన్‌ను పెంచుతాయి.
మోనోసోడియం గ్లుటామేట్ : కృత్రిమ స్వీటెనర్‌లు మరియు కొన్ని రుచిని పెంచే పదార్థాలు (అజినోమోటో) మైగ్రేన్‌కు కారణం కావచ్చు.
కెఫీన్ మరియు ఆల్కహాల్: అతిగా కాఫీ తాగడం లేదా అకస్మాత్తుగా మానేయడం వలన తలనొప్పి వస్తుంది. ముఖ్యంగా రెడ్ వైన్ వంటి ఆల్కహాల్ పానీయాలు తలనొప్పిని పెంచుతాయి.
మీరు ట్రిగ్గర్‌లను గుర్తించి, వాటిని విజయవంతంగా నివారించడం నేర్చుకుంటే, మీ మైగ్రేన్ ఫ్రీక్వెన్సీ మరియు తీవ్రత గణనీయంగా తగ్గుతుంది. ఆరోగ్యకరమైన, సంపూర్ణమైన ఆహారం తీసుకోవడం, తగినంత నీరు తాగడం, మరియు క్రమబద్ధమైన నిద్రను పాటించడం, ఇవన్నీ కలిసి మీ తలనొప్పిని అదుపులో ఉంచడానికి సహాయపడతాయి అంటున్నారు నిపుణులు.
