వేల ఏళ్ల నాటి మన భారతీయ ఆయుర్వేద శాస్త్రం కేవలం రోగాలకు మందులను మాత్రమే చెప్పలేదు, రోగాలే రాకుండా జీవించే అద్భుతమైన జీవన సూత్రాలను అందించింది. నేటి కాలంలో చిన్న వయసులోనే అనేక అనారోగ్య సమస్యలు చుట్టుముడుతున్న వేళ ఆయుర్వేదంలోని మూల సూత్రాలను అర్థం చేసుకోవడం చాలా అవసరం. నిండు నూరేళ్లు ఆరోగ్యంగా ఉత్సాహంగా జీవించాలంటే ఖరీదైన మందులు అవసరం లేదు ప్రకృతితో మమేకమై ఆయుర్వేదం చెప్పిన ఈ ఒకే ఒక్క రహస్యాన్ని పాటిస్తే చాలు.
ఆయుర్వేదం చెప్పే ఆ అత్యంత శక్తివంతమైన సూత్రం ‘మితాహారం మరియు కాల భోజనం’ అంటే ఆకలి వేసినప్పుడు మాత్రమే, మన కడుపులో సగం భాగం ఆహారంతో పావు భాగం నీటితో నింపి, మిగిలిన పావు భాగం గాలి ఆడేలా ఖాళీగా ఉంచాలి. మన జీర్ణవ్యవస్థను జఠరాగ్ని తో పోలుస్తారు అతిగా తినడం వల్ల ఆ అగ్ని ఆరిపోయి ఆహారం విషంగా మారుతుంది.
అదేవిధంగా, సూర్యోదయానికి అనుగుణంగా ఆహారం తీసుకోవడం అంటే మధ్యాహ్నం సూర్యుడు గరిష్ట స్థాయిలో ఉన్నప్పుడు ప్రధాన భోజనం చేయడం మరియు సూర్యాస్తమయం లోపు రాత్రి భోజనం ముగించడం వల్ల శరీరం సహజంగానే తనను తాను శుద్ధి చేసుకుంటుంది.
కేవలం ఆహారమే కాదు ‘దినచర్య’ను పాటించడం కూడా 100 ఏళ్ల ఆరోగ్యంలో భాగమే. ఉదయాన్నే సూర్యోదయానికి ముందే నిద్రలేవడం (బ్రాహ్మీ ముహూర్తం) గోరువెచ్చని నీరు తాగడం, మరియు ప్రతిరోజూ కనీసం 30 నిమిషాల పాటు యోగా లేదా ప్రాణాయామం చేయడం వల్ల శరీరంలోని వాత పిత్త, కఫ దోషాలు సమతుల్యంగా ఉంటాయి.
రాత్రి పూట సరైన నిద్ర శరీర కణజాలం పునరుద్ధరణకు తోడ్పడుతుంది. మనస్సు ప్రశాంతంగా ఉంటేనే శరీరం ఆరోగ్యంగా ఉంటుందని ఆయుర్వేదం చెబుతోంది, అందుకే అనవసరమైన ఆందోళనలను వదిలి సంతోషంగా ఉండటం కూడా ఒక మందే. ఈ సహజసిద్ధమైన అలవాట్లను మీ జీవనశైలిలో భాగం చేసుకుంటే, మందుల అవసరం లేకుండానే మీరు పరిపూర్ణ ఆరోగ్యాన్ని సొంతం చేసుకోవచ్చు.
గమనిక: పైన ఇచ్చిన సమాచారం సాధారణ ఆరోగ్య అవగాహన కోసం మాత్రమే. ఏదైనా దీర్ఘకాలిక అనారోగ్య సమస్యలు ఉన్నవారు లేదా కొత్త ఆహారపు అలవాట్లను ప్రారంభించే ముందు ఆయుర్వేద నిపుణులను సంప్రదించండి.
