కళ్లద్దాలపై ఉన్న అపోహలు నిజమా? అధ్యయనాలు, నిపుణుల క్లారిటీ

చాలామంది పిల్లలు పెద్దలు కంటి చూపు మందగించగానే కళ్లద్దాలు పెట్టుకోవడానికి సంకోచిస్తుంటారు. “అద్దాలు పెట్టుకుంటే చూపు ఇంకా తగ్గిపోతుందేమో?” లేదా ఒక్కసారి మొదలుపెడితే జీవితాంతం వాడాలా? అనే అనుమానాలు వారిని వేధిస్తుంటాయి. సమాజంలో కళ్లద్దాల గురించి ప్రచారంలో ఉన్న ఇలాంటి విషయాల్లో నిజమెంత? శాస్త్రీయంగా నిపుణులు ఏమంటున్నారు? అపోహలను పక్కన పెట్టి, మీ కళ్ల ఆరోగ్యం గురించి వాస్తవాలను తెలుసుకోవడం ఇప్పుడు చాలా అవసరం. ఆ వివరాలు మీకోసం..

అద్దాలు పెట్టుకుంటే చూపు ఇంకా తగ్గుతుందా?: ఇది చాలా మంది నమ్మే అతి పెద్ద అపోహ. నిజానికి, కళ్లద్దాలు పెట్టుకోవడం వల్ల చూపు తగ్గదు. వయస్సు పెరగడం వల్ల లేదా కంటి లోపల ఉండే లెన్స్ ఆకృతిలో మార్పుల వల్ల చూపులో మార్పు వస్తుంది. ఇక అద్దాలు కేవలం కాంతి కిరణాలు రెటీనాపై సరిగ్గా పడేలా చేస్తాయి. మీరు అద్దాలు తీసేసినప్పుడు ప్రపంచం మసకగా కనిపిస్తుంది కాబట్టి చూపు తగ్గిందని పొరబడతారు, కానీ వాస్తవానికి అద్దాలు మీ కళ్లకు విశ్రాంతినిస్తాయి.

అద్దాలకు అలవాటు పడిపోతామా?: “కళ్లద్దాలు పెట్టుకుంటే వాటికి కళ్ళు అలవాటు పడిపోయి, అవి లేకుండా ఉండలేము” అని చాలామంది భయపడుతుంటారు. దీనికి నిపుణుల సమాధానం ఒక్కటే మన మెదడు స్పష్టమైన దృశ్యాలను చూడటానికి ఇష్టపడుతుంది. ఇక అద్దాలు పెట్టుకున్నప్పుడు ప్రతిదీ క్లియర్ గా కనిపిస్తుంది కాబట్టి, మెదడు ఆ స్పష్టతకు అలవాటు పడుతుంది. ఇది వ్యసనం కాదు, మెరుగైన దృష్టి కోసం మన శరీరం కోరుకునే సౌకర్యం మాత్రమే.

క్యారెట్లు తింటే అద్దాలు అవసరం లేదా?: విటమిన్-A పుష్కలంగా ఉండే క్యారెట్లు కంటి ఆరోగ్యానికి మంచివే, కానీ అవి ఇప్పటికే ఉన్న సైట్ ను పూర్తిగా తొలగించలేవు. జన్యుపరమైన కారణాలు లేదా కంటి పొడవులో మార్పుల వల్ల వచ్చే దృష్టి లోపాలను కేవలం ఆహారంతో సరిచేయలేము. మంచి ఆహారం కంటి జబ్బులను నివారిస్తుంది కానీ, కళ్లద్దాల అవసరాన్ని పూర్తిగా రద్దు చేయలేదు.

డిజిటల్ యుగంలో స్క్రీన్ ప్రొటెక్షన్: ప్రస్తుతం మనం గంటల కొద్దీ కంప్యూటర్లు, ఫోన్ల ముందు గడుపుతున్నాం. దీనివల్ల కళ్లపై ఒత్తిడి పెరుగుతుంది. ఈ సమయంలో ‘బ్లూ కట్’ లెన్సులు లేదా యాంటీ గ్లేర్ అద్దాలు వాడటం వల్ల కళ్లకు రక్షణ లభిస్తుంది. అద్దాలు కేవలం సైట్ ఉన్నవారే కాదు, కంటిని అలసట నుండి రక్షించుకోవాలనుకునే వారు కూడా నిపుణుల సలహాతో వాడవచ్చు.

గమనిక: పైన ఇచ్చిన సమాచారం ప్రాథమిక అవగాహన కోసం మాత్రమే. కంటి చూపులో మార్పులు గమనించినట్లయితే వెంటనే నేత్ర వైద్య నిపుణుడిని సంప్రదించి పరీక్షలు చేయించుకోవాలి.