ఈ రోజుల్లో చేతిలో ఫోన్ ఉంటే చాలు, లోకాన్ని మర్చిపోయి గేమ్స్లో మునిగిపోతున్నారు చాలామంది. పైకి ఇది కేవలం కాలక్షేపంలా కనిపిస్తున్నా, దీని వెనుక ఒక లోతైన మానసిక సంఘర్షణ దాగి ఉండవచ్చని సైకాలజిస్టులు హెచ్చరిస్తున్నారు. కేవలం గెలవాలనే కసి మాత్రమే కాదు, జీవితంలోని ఒత్తిడి నుండి తప్పించుకోవడానికి చేసే ప్రయత్నమే ఈ “గేమింగ్ అడిక్షన్”. అసలు మనం ఆడుతున్నామా లేక మనతో గేమ్ ఆడుతోందా? ఈ విషయాలు ప్రతి ఒక్కరూ తెలుసుకోవాలి.
ఎస్కేపిజం- లోకం నుండి పారిపోవడమేనా?: చాలామంది తమ వ్యక్తిగత జీవితంలో ఎదురయ్యే ఫెయిల్యూర్స్, ఒంటరితనం లేదా ఆందోళన (Anxiety) నుండి తప్పించుకోవడానికి గేమింగ్ను ఒక అస్త్రంగా వాడుకుంటారు. కొందరు వారిలోని లోపాన్ని కప్పిపుచ్చటానికి, నిజ జీవితంలో దొరకని గుర్తింపు, గెలుపు గేమ్లో సులభంగా దొరుకుతాయి. ఈ “వర్చువల్ సక్సెస్” ఇచ్చే కిక్కు వల్ల మెదడులో డోపమైన్ విడుదలయ్యి, మళ్ళీ మళ్ళీ ఆడాలనిపిస్తుంది. ఇదే క్రమంగా ‘సైకాలజికల్ డిస్ట్రెస్’ లేదా మానసిక వేదనకు దారితీస్తుంది.
డిప్రెషన్ సంకేతాలు కావచ్చు!: గంటల తరబడి గదుల్లో కూర్చుని గేమ్స్ ఆడేవారిలో తరచుగా చిరాకు, నిద్రలేమి, ఆకలి మందగించడం వంటివి కనిపిస్తాయి. ఏదైనా పని మీద దృష్టి పెట్టలేకపోవడం, మనుషులతో కలవడానికి ఇష్టపడకపోవడం వంటివి తీవ్రమైన మానసిక ఒత్తిడికి సంకేతాలు. తమ బాధను ఎవరికీ చెప్పుకోలేక, గేమ్స్ ద్వారా ఆ ఎమోషన్స్ని అణచివేయడానికి ప్రయత్నిస్తుంటారు. దీనివల్ల సమస్య తగ్గకపోగా, మరింత ముదురుతుంది.
కొందరు ఎవరితో కలువకుండా అలాగే ఆ గేమ్ ఆడుతూ, అందరితో మాట పడుతున్న దాన్ని వదలరు. ఒకసారి ఆలోచించండి మనకి సరదా కాలక్షేపం కావాలంటే ఎన్నో మార్గాలు వున్నాయి. ఇంట్లో వారితో ఇండోర్ గేమ్స్ ఆడటం,లేదా టీవీ చూడటం,బుక్స్ చదువుకోవటం,ఇలా మీ అభిరుచికి తగినట్టు కొంత సమయం గడపటం అలవాటు చేసుకోవాలి.
పరిష్కారం ఎక్కడ ఉంది?:గేమ్స్ ఆడటం తప్పేం కాదు, కానీ అది మీ జీవితాన్ని శాసించకూడదు.
లిమిట్ సెట్ చేసుకోండి: రోజుకు ఎంత సమయం కేటాయించాలో ముందే నిర్ణయించుకోవాలి. ఆ సమయం తరువాత ఇంక ఆపేయండి,లేదా వేరే పని చూసుకోండి.
నిజమైన స్నేహాలు: ఫోన్ పక్కన పెట్టి మనుషులతో మాట్లాడటం, ఇంట్లో, బయట ఆరుబయట ఆడుకోవడం అలవాటు చేసుకోవాలి.
కారణాన్ని వెతకండి: మీరు ఎందుకు ఎక్కువగా గేమ్స్ ఆడుతున్నారో ఆలోచించండి. ఏదైనా బాధ మిమ్మల్ని వేధిస్తుంటే ఆత్మీయులతో పంచుకోండి.
గేమ్ అనేది కేవలం వినోదం కోసం ఉండాలి కానీ, అది ఒక వ్యసనంగా మారి మీ మానసిక ఆరోగ్యాన్ని దెబ్బతీయకూడదు. లోపల ఉన్న అసంతృప్తిని గేమ్స్తో కప్పిపుచ్చలేము. కాబట్టి, ఆన్లైన్ లోకం కంటే ఆఫ్లైన్ ప్రపంచం ఎంత అందంగా ఉంటుందో గుర్తించడమే అసలైన విజయం.
