ప్రకృతి రహస్యం: స్వశరీరాన్ని ఆహారంగా మార్చే జంతువులు

ప్రకృతి అంటేనే ఒక అంతుచిక్కని రహస్యం ఇక్కడ ప్రతి జీవి మనుగడ కోసం తనదైన రీతిలో పోరాడుతుంది. కొన్నిసార్లు ఈ పోరాటం మనకు చాలా వింతగా, ఆశ్చర్యకరంగా అనిపిస్తుంది. సాధారణంగా జంతువులు ఇతర జీవులను వేటాడి తినడం మనకు తెలుసు. కానీ, కొన్ని జీవులు తమ ప్రాణాలను కాపాడుకోవడానికో లేదా తమ పిల్లల ఆకలి తీర్చడానికో సొంత శరీర భాగాలనే ఆహారంగా మార్చుకుంటాయి. వినడానికి కొంచెం కష్టంగా ఉన్నా, ఈ స్వయం భక్షణ వెనుక ఉన్న వింత కారణాలేంటో ఇప్పుడు చూద్దాం.

ఆక్టోపస్- ఒత్తిడిలో తననే తాను కొరుక్కుంటుంది: సముద్ర గర్భంలో ఉండే ఆక్టోపస్‌లు చాలా తెలివైనవి. కానీ ఇవి తీవ్రమైన ఒత్తిడికి లోనైనప్పుడు లేదా ఏదైనా వ్యాధి సోకినప్పుడు వింతగా ప్రవర్తిస్తాయి. తమ సొంత చేతులను తామే కొరుక్కుంటాయి. దీనిని శాస్త్రీయంగా ‘ఆటోఫాగీ’ అంటారు. అయితే ఇది ఆకలి వల్ల కాకుండా, మానసిక వేదన లేదా ఇన్ఫెక్షన్ వల్ల జరిగే ప్రక్రియ అని శాస్త్రవేత్తలు చెబుతుంటారు.

బల్లులు- తోకను వదిలేయడమే కాదు: మన ఇంట్లో ఉండే బల్లులు శత్రువుల నుండి తప్పించుకోవడానికి తమ తోకను విరిచేసుకుంటాయి. ఆ తోక కదులుతుంటే శత్రువు దృష్టి దాని మీద ఉన్నప్పుడు బల్లి తప్పించుకుంటుంది. అయితే, ఆ తర్వాత ప్రమాదం తప్పాక, బల్లి తిరిగి వచ్చి ఆ తోకను తినేస్తుంది. ఎందుకంటే ఆ తోకలో చాలా పోషకాలు, కొవ్వు నిల్వ ఉంటాయి. కోల్పోయిన శక్తిని తిరిగి పొందడానికి ఇది ఒక మార్గం.

మాతృప్రేమకు పరాకాష్ట: సాలెపురుగులు, కొన్ని రకాల ఆడ సాలెపురుగులు తమ పిల్లల కోసం చేసే త్యాగం చూస్తే కళ్లు చెమర్చుతాయి. పిల్లలు పుట్టగానే వాటికి ఆహారం దొరకడం కష్టమవుతుంది. అప్పుడు ఆ తల్లి సాలెపురుగు తన శరీర అవయవాలనే కరిగించుకుని పిల్లలకు ఆహారంగా అందిస్తుంది. చివరికి పిల్లలు తల్లిని పూర్తిగా తినేస్తాయి. తన వంశం నిలబడాలని ఆ తల్లి చేసే గొప్ప త్యాగం ఇది.