నేటి ఉరుకుల పరుగుల జీవితంలో యవ్వనంగా కనిపించాలని అందరూ కోరుకుంటారు. కానీ, పగడంతా డైట్, జిమ్ అంటూ కష్టపడి.. రాత్రి పడుకునే ముందు చేసే కొన్ని చిన్న చిన్న తప్పులు మీ అందాన్ని, ఆరోగ్యాన్ని హరిస్తున్నాయని తెలుసా? 25 ఏళ్లకే 40 ఏళ్ల వారిలా కనిపిస్తున్నారంటే దానికి కారణం మీ ‘నైట్ రొటీన్’ కావచ్చు. ముడతలు, నల్లటి వలయాలు నీరసం.. ఇవన్నీ మీరు నిద్రపోయే ముందు చేసే పనుల వల్లే వస్తున్నాయి. అవేంటో ఇప్పుడు చూద్దాం..
బ్లూ లైట్ – చర్మానికి పెద్ద శత్రువు: చాలామందికి పడుకునే ముందు చీకట్లో ఫోన్ చూడటం ఒక అలవాటు. ఫోన్ స్క్రీన్ నుండి వచ్చే ‘బ్లూ లైట్’ మీ కళ్లకు మాత్రమే కాదు, చర్మానికి కూడా చాలా ప్రమాదకరం. ఇది చర్మంలోని కొల్లాజెన్ను దెబ్బతీస్తుంది, దీనివల్ల త్వరగా ముడతలు వస్తాయి. అంతేకాకుండా, మెదడుకు “ఇంకా పగలే ఉంది” అనే సంకేతాన్ని పంపి నిద్రను దూరం చేస్తుంది. నిద్ర సరిగ్గా లేకపోతే బాడీ రిపేర్ మెకానిజం ఆగిపోయి, ముసలితనం ఛాయలు త్వరగా కనిపిస్తాయి.
లేట్ నైట్ స్నాకింగ్ మరియు షుగర్: రాత్రి 11 గంటల తర్వాత చిప్స్, బిస్కెట్లు లేదా స్వీట్లు తినడం యవ్వనానికి గొడ్డలి పెట్టు వంటిది. రాత్రిపూట చక్కెర స్థాయిలు పెరిగితే ‘గ్లైకేషన్’ అనే ప్రక్రియ జరుగుతుంది. ఇది చర్మం సాగే గుణాన్ని తగ్గించి ముఖం వాచినట్లుగా లేదా వడలిపోయినట్లుగా కనిపించేలా చేస్తుంది. జీర్ణక్రియపై పడే ఈ అదనపు భారం వల్ల కణాల పునరుద్ధరణ మందగిస్తుంది ఫలితంగా మీరు పొద్దున్నే లేవగానే నీరసంగా వయసు పైబడిన వారిలా కనిపిస్తారు.
మేకప్ వదలకుండా పడుకోవడం: అమ్మాయిలైనా, అబ్బాయిలైనా బయటకు వెళ్లినప్పుడు రాసుకున్న క్రీములు లేదా మేకప్ను రాత్రి క్లీన్ చేయకుండా పడుకోవడం చాలా పెద్ద తప్పు. పగడంతా చర్మంపై చేరిన ధూళి, కాలుష్యం రాత్రిపూట రంధ్రాలను మూసివేస్తాయి. రాత్రి సమయంలో చర్మం శ్వాస తీసుకోవాలి. అలా జరగకపోతే మొటిమలు, మచ్చలు రావడమే కాకుండా చర్మం తన సహజమైన మెరుపును కోల్పోయి నిర్జీవంగా మారుతుంది. ఇది మిమ్మల్ని మీ వయసు కంటే పెద్దవారిగా చూపిస్తుంది.
నిద్రపోయే భంగిమ కూడా ముఖ్యమే: వినడానికి వింతగా ఉన్నా.. మీరు పడుకునే పద్ధతి కూడా మీ ముఖంపై ముడతలను నిర్ణయిస్తుంది. బోర్లా పడుకోవడం లేదా ముఖాన్ని దిండుకు నొక్కి పెట్టి పడుకోవడం వల్ల చర్మంపై ఒత్తిడి పడి ‘స్లీప్ లైన్స్’ ఏర్పడతాయి. ఇవి కాలక్రమేణా శాశ్వత ముడతలుగా మారుతాయి. వెల్లకిలా పడుకోవడం వల్ల ముఖ కండరాలపై ఒత్తిడి ఉండదు మరియు రక్త ప్రసరణ సరిగ్గా జరుగుతుంది. సరైన భంగిమలో నిద్రపోవడం వల్ల ముఖం తాజాగా, యవ్వనంగా ఉంటుంది.
యవ్వనం అనేది మనం తీసుకునే ఆహారంలోనే కాదు, మనం పాటించే క్రమశిక్షణలో కూడా ఉంటుంది. రాత్రిపూట మీ శరీరం తనను తాను మరమ్మతు చేసుకునే సమయం. ఆ సమయంలో మీరు చేసే చిన్న పొరపాట్లు ఆ ప్రక్రియను అడ్డుకుంటాయి.
