ఒక దేశం ధనిక దేశంగా ఎదగాలంటే భారీ విమానాశ్రయాలు, సొంత కరెన్సీ ఉండాలని మనం అనుకుంటాం. కానీ ఐరోపాలోని ‘లిక్టెన్స్టైన్’ అనే చిన్న దేశం మాత్రం ఇవేమీ లేకుండానే ప్రపంచంలోనే అత్యంత సంపన్న దేశాల్లో ఒకటిగా వెలుగొందుతోంది. కేవలం 160 చదరపు కిలోమీటర్ల వైశాల్యం ఉన్న ఈ దేశం తన వింతైన ఫీచర్లతో ప్రపంచాన్ని ఆశ్చర్యపరుస్తోంది. అసలు ఈ దేశం అంత ధనిక దేశం ఎలా అయ్యిందో ఇప్పుడు తెలుసుకుందాం..
విమానాశ్రయం లేని వింత: లిక్టెన్స్టైన్ దేశానికి సొంతంగా ఒక్క విమానాశ్రయం కూడా లేదు. పర్వత ప్రాంతం కావడం వల్ల అక్కడ రన్వే నిర్మించే అవకాశం లేకపోయింది. ఈ దేశానికి వెళ్లాలంటే పొరుగు దేశాలైన స్విట్జర్లాండ్ లేదా ఆస్ట్రియాలోని విమానాశ్రయాల్లో దిగి, అక్కడి నుండి రోడ్డు మార్గంలో ప్రయాణించాలి. విమానాలు లేకపోయినా పర్యాటకం మాత్రం ఇక్కడ ఓ రేంజ్లో ఉంటుంది.
సొంత కరెన్సీ కూడా లేదు: చాలా దేశాలు తమ ఆర్థిక వ్యవస్థ కోసం సొంత కరెన్సీని ముద్రించుకుంటాయి. కానీ లిక్టెన్స్టైన్ మాత్రం పొరుగు దేశమైన స్విట్జర్లాండ్తో ఒప్పందం కుదుర్చుకుని ‘స్విస్ ఫ్రాంక్’నే తన అధికారిక కరెన్సీగా వాడుతోంది. సొంత కరెన్సీ లేకపోయినా, ఈ దేశంలో తలసరి ఆదాయం మాత్రం ప్రపంచంలోనే టాప్ లెవల్లో ఉంటుంది.
అత్యంత సంపన్న దేశం ఎలా అయింది?:ఈ దేశం ఇంత ధనికంగా మారడానికి ప్రధాన కారణం అక్కడి పన్నుల విధానం. లిక్టెన్స్టైన్ను ‘ట్యాక్స్ హెవెన్’ అని పిలుస్తారు. ఇక్కడ కంపెనీలపై పన్నులు చాలా తక్కువగా ఉండటంతో ప్రపంచవ్యాప్తంగా ఉన్న ఎన్నో దిగ్గజ సంస్థలు తమ కార్యాలయాలను ఇక్కడ రిజిస్టర్ చేసుకున్నాయి. అలాగే ఇక్కడి బ్యాంకింగ్ వ్యవస్థ కూడా చాలా పటిష్టంగా ఉంటుంది.
చిన్న దేశం – పెద్ద విశేషాలు: కేవలం 40 వేల లోపు జనాభా ఉన్న ఈ దేశంలో నిరుద్యోగిత అనేది అస్సలు కనిపించదు. ఇక్కడి ప్రజల జీవన ప్రమాణాలు చాలా ఉన్నతంగా ఉంటాయి. శాంతియుతమైన వాతావరణం, ప్రకృతి అందాలు, పటిష్టమైన ఆర్థిక వ్యవస్థ వెరసి లిక్టెన్స్టైన్ను ప్రపంచ చిత్రపటంలో ఒక ప్రత్యేకమైన దేశంగా నిలబెట్టాయి.
