నేటి కాలంలో స్మార్ట్ఫోన్ అనేది మన శరీరంలో ఒక భాగం అయిపోయింది. అయితే గర్భిణీలు ఫోన్ వాడితే పుట్టబోయే బిడ్డపై ప్రభావం పడుతుందని సోషల్ మీడియాలో రకరకాల వార్తలు వస్తుంటాయి. నిజానికి ఫోన్ను పూర్తిగా పక్కన పెట్టాల్సిన అవసరం లేదు కానీ, అది వాడే పద్ధతిలో కొన్ని మార్పులు చేసుకోవడం చాలా ముఖ్యం. రేడియేషన్ ప్రభావం పడకుండా ఉండేందుకు నిపుణులు చెబుతున్న కొన్ని సింపుల్ టిప్స్ మరియు జాగ్రత్తలు ఇప్పుడు చూద్దాం.
రేడియేషన్ భయం నిజమేనా?: స్మార్ట్ఫోన్ల నుంచి వచ్చే Radio Frequency వల్ల బిడ్డకు నేరుగా హాని జరుగుతుందని చెప్పడానికి ఇప్పటివరకు ఎలాంటి బలమైన శాస్త్రీయ ఆధారాలు లేవు. అయితే, ఏవైనా అలవాట్లు అతిగా ఉంటే అవి మన ఆరోగ్యంపై ప్రభావం చూపిస్తాయి. ఇక ముఖ్యంగా గర్భిణీలు ఫోన్ను తమ పొత్తికడుపు (Abdomen) కు దగ్గరగా ఉంచుకోకుండా జాగ్రత్త పడాలి. ఫోన్ను శరీరానికి ఎంత దూరంగా ఉంచితే అంత మంచిది.
మాట్లాడేటప్పుడు ఈ జాగ్రత్తలు తీసుకోండి: కాల్స్ మాట్లాడేటప్పుడు ఫోన్ను నేరుగా చెవి దగ్గర ఉంచుకోకుండా, Earphones లేదా స్పీకర్ మోడ్ వాడటం అలవాటు చేసుకోండి. దీనివల్ల రేడియేషన్ ప్రభావాన్ని గణనీయంగా తగ్గించవచ్చు. అలాగే, సిగ్నల్ తక్కువగా ఉన్నప్పుడు లేదా బ్యాటరీ చాలా లోగా ఉన్నప్పుడు కాల్స్ మాట్లాడకపోవడమే మంచిది. ఇక ఎందుకంటే ఆ సమయంలో ఫోన్ సిగ్నల్ కోసం ఎక్కువ రేడియేషన్ను విడుదల చేస్తుంది.
నిద్రపై ప్రభావం పడకుండా: రాత్రిపూట పడుకునే ముందు చాలాసేపు ఫోన్ చూడటం వల్ల అందులో నుంచి వచ్చే Blue Light నిద్రలేమికి కారణమవుతుంది. గర్భిణీలకు సరైన నిద్ర చాలా అవసరం. అందుకే నిద్రపోవడానికి కనీసం ఒక గంట ముందు ఫోన్ను పక్కన పెట్టేయాలి. ఇక ఫోన్ను దిండు పక్కన పెట్టుకుని పడుకోవడం కంటే, కొంచెం దూరంగా ఉన్న టేబుల్ మీద ఉంచడం సురక్షితం.
డిజిటల్ డిటాక్స్ అవసరం: రోజంతా ఫోన్తోనే గడపకుండా కొంచెం సమయం ఫిజికల్ యాక్టివిటీకి లేదా పుస్తకాలు చదవడానికి కేటాయించండి. సోషల్ మీడియాలో వచ్చే అనవసరపు వార్తలు చూసి టెన్షన్ పడటం కంటే, ప్రశాంతమైన మ్యూజిక్ వినడం వల్ల తల్లికి, బిడ్డకు ఇద్దరికీ మేలు జరుగుతుంది.ఇక గర్భవతులు మానసికంగా ఎంత ప్రశాంతంగా ఉంటే, పుట్టబోయే బిడ్డ అంత ఆరోగ్యంగా ఉంటుంది.
టెక్నాలజీని వాడుకోవడం తప్పు కాదు, కానీ అది మన ఆరోగ్యాన్ని దెబ్బతీసేలా ఉండకూడదు. ప్రెగ్నెన్సీ సమయంలో చిన్న జాగ్రత్తలు పాటిస్తే ఎటువంటి భయం లేకుండా స్మార్ట్ఫోన్ వాడుకోవచ్చు.
గమనిక: ఈ సమాచారం కేవలం అవగాహన కోసం మాత్రమే. రేడియేషన్ ప్రభావం గురించి మీకు ఏవైనా ఆందోళనలు ఉంటే, మీ గైనకాలజిస్ట్తో చర్చించి మరిన్ని వ్యక్తిగత సూచనలు తీసుకోవడం ఉత్తమం.
